Federation Cup Pathianni zanah Aizawl FC inlan dawn

India rama football club-te knockout hmanga inelna ngaihhlut hlawh ber Federation Cup chu Pathianni tlaiah khelh ṭan a ni dawn a, I League champion Aizawl FC chuan zan dar 7:00-ah Chennai City an hmachhawn nghal ang.

Season hmasaah inelna hi home & away hmanga khelh ni mah se kuminah erawh Cuttack, Odisha-ah match zawng zawng khelh vek a ni dawn a, final khelh hun tur la chiang lo mah se May thla chhunga khelh zawh turin ruahmanna erawh siam a ni thung.

Fed Cup match hmasa ber hi Pathianni tlai dar 4:00-a khelh tur niin East Bengal leh Churchill Brothers an inhmachhawn dawn a, champion tan AFC Cup khelh theihna tur inelnaa match zawng zawng hi Ten2 chuan live-in a pe chhuak ṭhin dawn a ni.

Inelna kalphung

Kum 1977-a neih ṭan Fed Cup-ah club pariatin inelna an hmachhawn dawn a, club pariatte hi I League-a top 8 team chin an ni. Team pariat hi group hnihah ṭhen an ni a, vawi khat ṭheuh inkhelh kual hnuah a sang pahnihin semifinal an lut ang.

Group A-ah Aizawl FC (1-na), East Bengal (3-na), Churchill Brothers (6-na) leh Chennai City (8-na) te an awm a, Group B-ah Mohun Bagan (2-na), Bengaluru FC (3-na), Shillong Lajong (5-na) leh DSK Shivajians (7-na) te an awm thung.

Ṭ-a tel loin

Aizawl FC players zin zingah midfielder V. Lalṭanpuia a tel lo. Mi­zo­ram Police aṭanga AFC-in loan-a an hawh midfielder hi practice-naah a inhliam avangin hruai tel a ni lo a, hrem vanga league match hnuhnung ber khel lotu captain Alfred Kemah Jaryan a inlan leh theih tawh dawn avangin Mizo club tan buaina tur erawh a ni lo.

I League champion hian season hmasa khan Fed Cup-ah final lutin an kalkawngah Bengaluru FC leh Sporting de Goa an hneh a, tun season-ah I League nomawi an chawi bawk avangin mipui beiseina a sang dawn - league nomawi chawi loh avangin Bengaluru FC, East Bengal leh Mohun Bagan te ṭum dang zawng aiin champion an tum a, Mizo club tan hna erawh a awlsam dawn lo tih a chiang.

Khua a lum

Ningani zan dar 10 velah Aizawl FC-in inelna neihna hmun tur Cuttack an thleng a, an hotel thlenna turin duhthu a sam loh avangin Cuttack aṭanga km 27 vela hla Bhubaneswar khawpui lamah an insawn.

Cuttack khawpui a lum a, 37°C/38°C hial a kai ṭhin avangin nisen sa hnuaia practice pawh a harsa hle. Mahse, match zawng zawng khelh hun tur hi tlai dar 4:00 hnu lam vek a ni a, Aizawl FC vanneihna belhchhahtu chu an group stage match zawng zawng hi zan dar 7:00-ah vek an khel dawn.

Chennai dinhmun

I League khelh zawh takah Aizawl FC-in match 18-ah vawi thum chiah chak lo hmel an hmu a, an club hneh loh zingah Chennai City an tel - Mizo club hian khualmualah vek East Bengal, Bengaluru FC leh Chennai an ngam lo - Pathianni zanah South Indian club lakah an fimkhur a ṭul dawn tihna a ni.

Club pahnih intawn hmasak berah Chennai-in 2-0 in hnehna an chang a, RG Stadium-ah Aizawl-in 1-0 in an hneh let thung. Pathianni zana club pahnih inhmachhawnna tur Barabati Stadium erawh a hrechiang zawk an awm lo a, team ṭha zawk fiahna ṭha tak a ni ang.

Federation Cup - Group Stage
Group A
May 7, Pathianni
4:00 PM East Bengal Vs Churchill Brothers
7:00 PM Aizawl FC Vs Chennai City
May 9, Thawhlehni
4:00 PM Chennai City Vs East Bengal
7:00 PM Churchill Brothers Vs Aizawl FC
May 11, Ningani
4:00 PM Chennai City Vs Churchill Brothers
7:00 PM Aizawl FC Vs East Bengal
Group B
May 8, Thawhtanni
4:00 PM Bengaluru FC Vs Shillong Lajong
7:00 PM Mohun Bagan Vs DSK Shivajians
May 10, Nilaini
4:00 PM DSK Shivajians Vs Bengaluru FC
7:00 PM Shillong Lajong Vs Mohun Bagan
May 12, Zirtawpni
4:00 PM DSK Shivajians Vs Shillong Lajong
7:00 PM Mohun Bagan Vs Bengaluru FC

Tute nge zin?
Goalkeepers (2) : Albino Geovanni Gomes, Lalawmpuia
Defenders (7) : Zohmingliana Ralte, Kingsley Obumneme Eze, Lalramchullova, Lalruatthara, Ashutosh Mehta, Lalrinzuala Khiangte, Lalṭhakima
Midfielders (9) : Mahmoud Al Amna,
H. Lal­­­biak­thanga, Brandon Vanlalremdika, R. Lal­­dan­mawia, Albert Zohmingmawia, H. Lal­muankima, Lal­nuntluanga, Alfred Kemah Jaryan, Jayesh Rane
Forwards (4) : William Lalnunfela, Bayi Kamo Stephane, Jonathan Lalrawngbawla, Lalnunpuia Tlau
Coaching Staff
Coach : Khalid Jamil
Manager : Hmingthansanga Zadeng
Assistant coach : Siddique Abdul Azim, Lalruatdika,
Physio : RK Zothanpuia