Premier League champion Liverpool
You'll never walk alone
Thlipui nuai vel kara i kal changin
I lu chu chawi sang la
Thim a lo hnaihin hlau suh
Thlipui nuai vel karah sawn
Van thiang mawi tak a eng a
Sirva zaimawi takin a awi vel ram chu
Thlipui karah pawh kal zel la
Ruahpui nan hnuaiah kal zel la
I duhaisam ten nghin chang nei mahse
Kal la, kal zel la
I thinlunga beiseina nen chuan
Malin i kal ngai lo'ng e
Kum 1990 a ni a, England-a football league sang ber Football League First Division-ah Liverpool an champion. Coach Sir Kenny Dalglish hoin champion an lawm a, English football-a an league nomawi 18-na a ni. Khatih hun lai khan Liverpool han hnim hnai pha eih an awm lo - khuarei an chang ta.
Kum 1990-a piang tam takin nupui pasal an nei tawh a, fate 'A, B, C...' zirtir reng rengin an hmanhlel ta. Nupui pasal la hmu zo ve chiah lo te pawh ṭhenawm khawveng ten 'ṭha deuh' an hualsak a, "Nei ve tawh rawh," tih chu duhsakna ṭawngkam an dawn ngun pawl a ni.
Hetih chhung zawng hian Liverpool fan-ten league nomawi an chawi leh hun tur an thlir ṭhin a, a thleng thei reng reng lo! "Khawvel hian a nghah rei avangin a lo ngui zo ta a..." tih hla ang maiin Reds fan-te pawh an ngui zo ta.
Mahse, kum 2020 a herchhuah meuh chuan engmahin Liverpool a dal thei lo. Aw, ni e, engmahin! Team ṭha rual, sum leh pai, hripui meuh pawhin Liverpool a dang zo lo, a vawi khat nan Premier League champion an ni ta - khawvel hian hre rawh se!
Kan lawm e, Chelsea!
Covid-19 vanga Premier League chawlh lailawk a nih lai khan league nomawi chawi tura Reds-in an mamawh zat chu point ruk chauh a ni tawh a, Kop ho tan chuan coronavirus kha a ngeiawm lehzual.
Club ṭhenkhatin hri leng chhuanlamin tun season atan league tihtawp an duh thu an sawi a, 'engmah thleng lo' ang maia league tihtawp duhna ri ret ret chuan Reds fan-te rilru a ti hlauthawng.
Mahse, hri lengin zia lam a pan a, Premier League-in league tihtawp vanga an sum hloh tur zat ngaihtuah ran chungin league khelh chhunzawm an rel - Liverpool an champion lawk chuang lo.
Everton an inhnehtawkpui hnuah Crystal Palace an hneh a, point hnih an la mamawh cheu. Ningani zanah anmahni hnaih bertu Manchester City chu Chelsea-in 2-1 in an hnehsak a, khelmual rap loin Liverpool an champion.
Stevie, i tan...
Liverpool sawi rualin mi pakhat mitthlaah a lo lang ṭhin a, amah chu 'Liverpool' a ni e, tiin an sawi ṭhin - a hming chu Steven Gerrard a ni. Khawvela club lian tam tak hnara Reds tana rinawm thlangtu hian player a nih chhung zawngin Premier League nomawi a chawi lo.
Ropuina rama Liverpool hruai thlengtu Jurgen Klopp pawhin hei hi a theihghilh lo. German coach chuan lawm avanga a mittui luang dang let chungin, "Liverpool tana champion hi a ropui takzet. He nomawi hi Kenny, Stevie leh nangni, fan-te zawng zawng tan a ni," a ti.
Liverpool fan-ten league nomawi chawi turin kum 30 zet an nghak a, a reizia hriatpuitu chu Klopp a ni. Borussia Dortmund boss hlui chuan, "Kei chu kum li leh a chanve chiah ka la awm a, fan-te angin kum 30 ka nghak ve lo.
"Thla thum zet dinhmun chiang loin kan awm zui. Kan fan-te nen champion lawm ho a theih ve leh kan lawmho nghal dawn a ni," a ti a, Liverpool khawpui fang chunga Premier League nomawi chawi ngei a tum.
Hmabak a awm
Liverpool-in point 86 neiin umphak theih an ni ta lo a, heti zat point nei tur hian match 28-ah hnehna an chang a, vawi khat chiah an tlawm a, vawi hnih an khingpui an inhnehtawkpui - match sarih khelh tur an la nei.
Klopp-a nauten league nomawi chawi chiang tawh mah se record siam theih tur an la neih nual avangin an inthlahdah phah a rinawm loh a, Klopp ngeiin season tluana an theihna tawpa an khelh tur thu a sawi.
Reds hian Premier League season khata chak hnem ber record match 32 khum theihna chance an la nei a, mahni muala chak hnem ber (18), khualmuala chak hnem ber (16) leh champion chiang ber (19 points record) te an la siam thei.
Match sarih chiah awm tawh chunga an champion avanga Premier League champion hma ber record siamtu hian record dang siam belh zel an duh ang tih a chiang a, Liverpool an la hmuhnawm
dawn chauh.
Beiseina nei lote hnena beiseina petu Klopp
October 8, 2015 a ni a, German coach, palian lampang, a hming Jurgen Klopp chuan Liverpool manager a nihna angin media-a hmachhawn a, a sapṭawng thiamzia chu titi a tling nghal hat.
Camera leh light-ten an chhun rawn karah a ha var tak langin a nui a, "Beiseina reng nei lote chu beiseina kan siamsak leh dawn a ni," a ti a, "Kum li chhungin nomawi kan chawi em em ang," a ti bawk.
Ropui taka Borussia Dortmund lo kaihruai tawhtu a nih avangin khawvelin Klopp a ringhlel lo - engtiang takin nge milian mutthlu Liverpool chu a kaih thawh ang a, team ropuiah a din leh ang? tih chu an hriat châk a ni zawk.
Klopp-a'n Brendan Rodgers a rawn thlak lai hian Liverpool hi Premier League-ah 10-na an ni a, kum 2020 a herchhuah meuh chuan Champions League, UEFA Super Cup, Club World Cup leh Premier League nomawi an nei ta!
German coach-in a tihfuh ber nia an sawi ṭhin chu Mohamed Salah leh Sadio Mane a lalut hi a ni a, a luh hma awka Liverpool zawmtu Roberto Firmino nen khawvela tlarhma hlauhawm ber pawlah a siam.
Player pathum hian season thum pawh an khelhho tlin hmain goal 211 an khung tawh a, Salah (92), Mane (65) leh Firmino (54)-te hnathawh hi Liverpool champion-na kawngah theihnghilh theih a ni lo.
Liverpool-a 'beisei phak lo' tia an sawisel hman Jordan Henderson-a ṭhat chhoh dan enin Klopp fak loh a harsa a, defender naran Andy Robertson leh academy chhuak Trent Alexander-Arnold te vul chhoh dan enin Klopp chu fak mai tur a ni.
Tlarhnung lama world-class goalkeeper Alisson leh centre-back Virgil van Dijk te en ila, transfer bazar-ah Klopp-a'n a mamawh ang tak a lei zel tih a lang chiang a, he German coach hi fak lo tu nge awm thei ang?
Liverpool league nomawi 16, 17 leh 18-na chawipuitu Dalglish chuan, "Jurgen rawn kal hnua Liverpool dinhmun hi thlir a nuam takzet. Coach ṭha tak a ni a, Liverpool hlimthla pholangtu a ni.
"Jurgen a awm chhung chuan hlimna leh lawmna tam takin min hmuak a ni," a ti a, kum 30 zet hnuah Dalglish-a'n a pheikhawk hnutchhiah zo
taka inthawlhtu a tawng ve ta.
Liverpool fans an pungkhawm
Covid-19 vangin mipui punkhawm khap ni rih mah se Liverpool an champion meuh chuan fans an insum zo lo a, Chelsea-in Manchester City an hneh aṭanga darkar chanve chhungin fans 2,000 bawr vel chu Anfield pawnah an pungkhawm hman!
Liverpool fan-te hian halmawi hal chungin an champion an lawm a, khelmuala duty police-te pawhin fans hnawh bo tumna hi an nei lem lo - fan-te hi stadium bakah Liverpool City Centre-ah an pungkhawm bawk a, an hlapui ' You'll Never Walk Alone' chu an sa a ni.
Kum 30, player 218 leh £1.47bn!
Liverpool-in 1989-90 season-a league nomawi an chawi hnua player an lei hmasak ber chu Ronny Rosenthal a ni a, an champion season-a Standard Liege aṭanga an hawh player hi pound maktaduai khatin a nghetin an lalut.
Reds hian Premier League-a nomawi an chawi 18-na leh 19-na inkarah player 218 zet an lalut hman a, an lakluh hnuhnun ber chu January-a pound maktaduai 7.25 man Takumi Minamino kha a ni - hetih chhung hian pound tluklehdingawn 1.47 an hmang hman.
Luis Suarez leh Virgil van Dijk-te an lei fuh em em laiin Torben Piechnik, Bruno Cheyrou leh Sean Dundee-te erawh hriatreng chi an ni lo a, forward lei sual an nei nual bawk.
Andy Carroll (£35m, 44 league games, 6 goals), Christian Benteke (£32.5m, 29 league games, 9 goals) leh Mario Balotelli (£16m, 16 league games, 1 goal)-te kha ṭah ti chhuak khawpa an hlawhchhamna langsar zual an ni.
Kum 2005-2008 inkara Benitez-a'n player 40 ngawt a lakluh kha transfer bazar-a an chet nat ber ṭum tih theih a ni a, Pepe Reina, Dirk Kuyt, Lucas Leiva leh Fernando Torres-te a lei fuh viau laiin Mark Gonzalez leh Jermaine Pennant-te an ṭha pangngai a, Gabriel Paletta leh Sebastian Leto-te hming erawh a hre lo kan tam tawh zawk ang!
Hriat tel tur chu Liverpool hian player lei nan sum seng hnem viau mah se a hralhna aṭangin pound maktaduai 936.6 zet an hmu let tho a, hetih chhunga an player ṭha tam tak zingah Robbie Fowler, Gerrard, Carragher, Michael Owen leh Trent Alexander-Arnold-te chu anmahni academy aṭanga chhuak an ni.
Liverpool hian an league nomawi 18-na leh 19-na inkarah hian Kenny Dalglish (1990-91), Graeme Souness (1991-94), Roy Evans (1994-98), Evans/Houllier (1998), Gerrard Houllier (1998-2004), Rafael Benitez (2004-10), Roy Hodgson (2010-11), Kenny Dalglish (2011-12), Brendan Rodgers (2012-15) leh Jurgen Klopp (2015- )-te chu an nei hman.
Klopp-a'n Liverpool a rawn zawm hmasak ber ni aṭang khan engkim a rawn thlak nghal ni berin ka hria. A hnung kan zui a, a chungah rinna kan nghat tlat a, zinkawng hlimawm tak a ni. Hlawhtlinna tam zawk kan chhar zel ka beisei a, hlawhtlin châkin kan tuihal reng a ni. A pawimawh ber chu engtiklai pawha a chunga rinna kan nghat kha a ni a, tun hi min hruai thleng ta. A tel lo chuan vawiin hi kan thleng lo ang.
- Jordan Henderson,
Liverpool captain
Season hmasaah uiawm takin nomawi kan chawi thei lo a, kumina huaisen taka kan bei leh hian kan rilru puthmang chu chiang takin a pholang a ni. He tuihalna hian min chenchilh reng ang tih ka ring a, hlawhtlin zel kan duh. A tawp kan thleng hi a ropui takzet.
- James Milner, Liverpool midfielder
Kar 13 zet chu hma hun pawh hre loin kan awm a, engmah a chiang lo. Kan fan-te erawhin kum 30 an nghak a, keini nghah chhung nen khaikhin chi a ni lo. Zan hlimawm tak kan hmang angin anni pawhin zan duhawm tak an hman ka beisei.
- Andy Robertson, Liverpool left back
Kum duhawm tak kan hman chu Premier League nomawi hmanga chhanlet a ni ta. Liverpool chuan he game duhawm tak hi ṭum dang zawng aia duhawm lehzualah an chantir a nih hi.
- John W Henry, Liverpool neitu
Liverpool hian season duhawm tak an hmang a, champion an phu a ni. Season hnih liam taah khan point 25-in mi an thlau a, tun season-ah erawh min tlansan ta.
- Pep Guardiola, Manchester City boss
World class coach, coaching team leh player ṭha tak tak te tana hlawhtlinna ropui bik a ni. Liverpool neitu FSG lam hmaih an harsa a, a tawp berah erawh, a pawimawh ber fan-te ka lawmpui a ni - kum 30 an nghak a, hlim takin lawm rawh se.
- Steven Gerrard, Liverpool legend
Liverpool ka lawmpui takzet. Kum 30 hnuah beiseina chu a tak ram a chang ta. Reds zawng zawng ka lawmpui a, You'll never walk alone.
- Rafael Benitez, Liverpool boss hlui