Zaninah Bundesliga a tawp dawn

Germany rama football inelna sang ber Bundesliga chu zanin hian khelh zawh a ni dawn a, zan dar 7:00-ah match kua khelh tur la awm chu a rualin an khel vek ang. Bayern Munich-in champion an nemnghet tawh a, zanin hian Champions League leh Europa League khel tur bakah relegate turte a hriat dawn.

Bayern Munich hi kum 2013 aṭang khan Bundesliga-ah an la champion char char a, tun season hi a zawna vawi riat an champion-na a ni ta. Bavarian hian 'mia san mia' tih thupui an hmang ṭhin a, 'kan lan ang hi kan nihna chu a ni' tihna a ni a, Bayern hi league-ah vawi 30 champion tawh an nih avangin an ropui hle.

Hetia a zawna vawi riat an champion takah chuan 'mia san meister' tih theih an ni ta a, chumi awmzia chu 'a thiam ber chu kan ni' tihna a ni a, a thiam ber chu an ni chiang a ni. Season ṭantirhah Niko Kovac hmangin beisei pha lo mah se Hansi Flick hoin an champion chiang hle.

Amaherawhchu Covid-19 vangin Bayern-in ṭum dang angin champion an lawm thei lo a, match tawp berah chauh nomawi hlan tur a nih avangin Allianz Arena-ah nomawi an chawi dawn lo. Zanina VFL Wolfsburg nen Volkswagen Arena-a an inkhelh zawhah nomawi an chawi ang.

Bundesliga danah chuan stadium chhung chin tak takah mi 100 bak a luh theih lo a, chumi awmzia chu Bayern official leh board member-te pawhin team zingah an lawm thei dawn lo. Supporter bakah player leh coaching staff chhungte phei chu stadium-ah luh an la phal lo hrim hrim.

Hei chauh hi a ni lo, nomawi an inhlan lai pawhin Bayern player-ten social distancing an zawm a ṭul dawn. Kum danga an tih ṭhin ang beer hmanga an in leih ṭhin chu a tih theih dawn lo a, Munich mayor Dieter Reiter pawhin town hall-a nomawi inhlanna an neih leh ṭhin chu a theih loh tur thu a sawi lawk.

Season dang ang thoin Bayern ropui mah se coronavirus vangin kum dang angin ropui takin champion an lawm thei dawn lo. 

Champions League khel turin Bayern Munich leh Borussia Dortmund an tling tawh a, RB Leipzig pawh an goal difference a ṭhat avangin season thara Europe-a inelna sang ber khel turin an tling tawhah a ngaih theih. Leipzig hian zanin dar 7:00 hian Augsburg an tlawh ang.

Hmun ruak pakhat la awm hi Borussia Monchengladbach leh Bayer Leverkusen ten an inchuh dawn. Gladbach hian Hertha Berlin an mikhual dawn a, goal difference an neih ṭhat avangin point khat an hlawhchhuah chuan UCL an khel thei ang.

Bayer Leverkusen-in Mainz 05 an mikhual dawn a, Champions League khel turin an chak ngei a ngai. Kai Havertz awmna team hian hnehna chang pawh ni se Gladbach-in point an hmuh chuan Europa League-ah an lungawi a ṭul dawn a ni.

Bundesliga-ah 17-na leh 18-na te an relegate ṭhin a, 16-na in playoff an khel leh ṭhin. Table mawngphaha awm Paderborn an relegate tawh a, Fortuna Dusseldorf leh Werder Bremen te pawhin 15-naa awm Augsburg an pha thei tawh lo.

Chutihrualin 17-naa awm Bremen tan playoff khelh beiseina a la awm a, zanina FC Cologne an hneh thei a, Dusseldorf-in Union Berlin an hneh loh bawk chuan playoff an khel thei ang.