Hmasawn a la ngai - Zidane

Real Madrid leh Barcelona ten na takin La Liga nomawi an inchuh mek a, hmahruaitu Real manager Zinedine Zidane chuan an thlen chin chu lungawi thlak viau mah se hmasawn an la ngaih thu a sawi.

Zidane chuan, "Ball kan chan hnem leh zual a ngai, kan match hnuhnung paliah hnehna changin khel ṭha viau mah ila duhthusam lohna lai deuh a la awm. Match khelh hmabak a pawimawh vek tawh a, hnehna chang turin inkhel kan thunun a ngai.

"Real Madrid kan nih chuan khingpui lakah zam loin kan khel tur a ni," a ti. Zidane hian a naute chu inrintawkna nei sang leh zual turin a duh a, inhnaih tak taka match an neih avangin player a siksawi ṭhin tur thu a sawi tel bawk.

La Liga champion lai Barcelona chu coronavirus len hnuah Sevilla nen an inhnehtawk a, point an hloh vangin league hmahruaitu an nihna chu Real Madrid lakah an chan. Spanish club lian pahnih hi an point hmuh chu a la inzat reng, khelh hmabak pasarih an la neihah chetsual a thiang lo ve ve.