Team 204-a thiam zual 16 chauh an bang ta! Aizawl team chhung 6; Aizawl pawn team 10

LBS Suzuki Inter Village Football Tour-nament 2022-a team 204 inelna zingah 16 chauh an dam ta, team 188 zet an tla tawh.

Vawiinah Lammual leh Mualpuiah last 16 hi khelh a ni dawn. July 11, Thawhṭanniah last 16 match hnih a awm bawk ang. Inelna hi July 19-ah a hmawr bawk a ni dawn.

Hripui leng vangin kum hnih chuang kan inkhuahkhirh a, tunah kan zalen ta a - tualchhung football pawhin hlut a hlawh zual. Lammual inkhel bik hi Zonet TV leh YouTube-ah live ṭhin a ni.

Thingtlang an ṭha
Inter Village Football-ah hian Aizawl district aṭangin team 103 an tel a, heng zinga 71 hi AMC area chhunga awm an ni. District dang aṭangin–Mamit (26), Kolasib (19), Serchhip (15), Saitual (13), Champhai (8), Khawzawl (8), Lawngtlai (6), Hnahthial (3), Lunglei (2) leh Siaha (1) te an tel bawk.

Last 16-ah hian, Aizawl team paruk–Salem Veng LC, Republic Veng LC, Vaivakawn LC, Armed Veng South LC, Bungkawn LC leh Ramhlun North LC-te an la dam.

Aizawl pawn aṭangin team 10–Farkawn VC, Mamit Jt VC, Sialhawk VC, Seling VC, Hnahthial Jt VC, Lengpui VC, Champhai Kanan VC, Lungdai VC, Khawzawl Vengthar VC leh Thenzawl West VC te an la dam thung.

Hnahthial versus Khawzawl
Inelna ṭan hma aṭanga Aizawl khaw pawn lam team ṭha sawi chian ngam chu Hnahthial Jt VC hi an ni - Mizoram aiawha khel tawh hlang deuhthaw an ni. Anni ang bawka team ṭha Khawzawl Vengthar VC nen vawiin chawhnu dar 2:00 hian RG Stadium, Mualpuiah an inhmachhawn dawn.

Hnahthial assistant coach C. Lalramdin-sanga chuan, "Hrem vangin captain J Lalchhanhima kan chhawr thei dawn lo, chutih rualin kan squad a chhah ṭha a, tlarhnunga a hmun ruak hnawh khat thei tur kan nei," tiin Vanglaini a hrilh.

Match li an khelh tawhah Hnahthial hian goal 27 khung tawh - an lamah goal khat chiah a la lut, an thiam tih a chiang.

Player nei ṭha leh team enkawltu experience nei ṭhain an enkawl Khawzawl hi an chhe lo - Ramhlun South hnehtu kha an ni - Coach Lalnaua hi Mizoram team pawh enkawl tawhtu a ni a, Mizoram striker hlui Sawmdawnga nen team hi an enkawl.

Inkhel hmasaa hrem tawk Aizawl FC defender Lalṭhakima a khel thei tawh dawn a, MPL-a tlan chak pawl Vanlallawma an nei bawk - a hmuhnawm dawn.

Apuia team vs Champhai Kanan
Tournament tirah khan Vaivakawn hi rinkai an ni lo. Lalengmawia Ralte awmna a nih avang erawh chuan ngaihven hlawh zinga mi an ni. Captain Apuia hoa khel hian an match hmasa berah Kawrtethawveng chu si khat faiin an hneh hram.

He mi hnu hian team ṭha Electric Veng an hmet mit a, Chhinga Veng lakah rinkai lo zawk ni mah se penalty shootout hmangin an chak a, champion tura rinkai leh team ṭha ber zinga mi Bethlehem Vengthlang chu penalty hmang bawkin an hneh - vanneih vang chauh ni loin thiam tel a ngai.

Vawiin hian Vaivakawn hian Champhai Kanan an hmachhawn ang. Champhai Kanan hian Mizo defender ṭha Chhawnkima an nei a, midfield-ah MFA Cup best player Lalramsanga an nei bawk.

Champhai team ṭha Kanan tan Vaivakawn hi fiahna a ni dawn a, chawhnu lam dar 2:00 a inkhel hi a hmuhnawm ang.

Danmawia khua Sialhawk
Sialhawk sawi nan hian, "A pui keih keih, chak lo thei lo," tih te chu social media lama hman lar a ni. R. Laldanmawia telna team hian an hmaa ding apiang an hneh chho zel a, Sialhawk Express hoin vawiinah Mamit Jt VC an tum ang.

Fans nei ṭha Sialhawk tan tun hnaia ṭan la thar Mamit lam hi 'hneh sa' tih chi an ni lo, tun tournament-ah hian Mamit district team dangte pawh an che chhe lo hle.

Inkhelh ṭan hma leh inkhelh lai, inkhelh ban thlengin Sialhawk fans che vel a hmuhnawm a, an inkhel pawh chuti bawk - Mamit hi inkhel en turin an khua aṭangin an lo chho nual dawn niin an sawi.

Lengpui hmaah Seling
CYMA football-a Aizawl pawn aṭanga champion thei awm chhun Lengpui hian champion an tum ngam - chutiang tur khawp chuan player an nei ṭha.

ISL star Joe Zohera, I League winger ṭha Remsanga leh India international hlui Lalchhuanmawia an nei a ni mai lo - coach Rohmingthanga hrual player hi an fit a, langsar lem lo talent ṭha an kawl nual.

Hetia en mai chuan Seling tan Lengpui hi huphurhawm tur ni mah se an inkhelhna tur hi Lengpui ni loin Lammual a ni - chak an tum ve tlat ang.

Salem Veng khelmualah Farkawn
Farkawn hi inbuatsaihna nei ṭha, fans nei ṭha, talent nei ṭha an ni a, anni hian team ṭha Salem Veng nen RG Stadium-ah chungnung zawk nih an inchuh dawn.

Farkawn hian 'home' a khel tur Salem Veng hneh an tum ngam dawn - Kolasib team ṭha an lehthal aṭang khan hma an sawn zel.

Salem Veng erawh player ena bûk rit zawk an ni a, Mizoram aiawha khel tawh an tlar thluah dawn a, coach Rindika hi tun hnaia coach duhawm ber pawk a ni. Fans ni se an pui tham dawn tih a chiang - chutih rualin a lar lar chakna tournament a ni bik lo tih kan hmu.

Republic Veng inlan hun
Rinkai zinga mi Republic Veng hian goal an la chhuah lo. Mizo striker ṭha ber pawl F. Lalrinpuia upa ve deuh ṭan mah se striker chak Hriata an nei tel a, midfielder hmuhnawm bik rawlthar Hriatpuia an kawl a, defender rinawl Muanawma hrem vanga a khel thei lo tur erawh a pawi thei.

Republic hian vawiin chhun dar 12:00 hian Lammualah Lungdai VC an hmachhawn dawn - anni hi 'giant killer' Kolasb Ṭumpui hnehtu an nih avangin an chhe lo tih a chiang e.