BCA hmachhawn tur TBL

An inkhel kual an inkhel kual a, a tawpah chuan team ṭha pahnih bawkin a hmawr an bawk leh dawn ta. Khatla TBL chuan Mission Veng Hotshots hnehin Mizoram Super League season 7 final an lut, champion lai Zarkawt BCA nen nomawi an inchuh ang.

MSL finals hi best of three series hmanga chak zawk zawn a ni dawn, champion tur chuan vawi hnih tal chak a ngai tihna a ni. July 12, Thawhlehni hian R. Dengṭhuama Indoor Stadium, Mualpuiah game 1 an khel ang.

Ningani zan Play In inkhelah TBL hian Hotshots chu 105-74 in an hneh a, hnehna an chan theih nan Vanlalṭhazuala chu player langsar niin, point 31 a neih bakah rebound vawi sarih a la a, a ṭhiante basket neih tur vawi 10 a siamsak bawk - double double a nei.

League table-a pahnihna TBL hian 'play in' an game hmasaah Zarkawt BCA an hneh lo. League round lama an chetṭhatna an la chhawr ṭangkai a, 'play in' an game hnihnaah tlang turin vawi khat chak hi an tan a tawk.

Hotshots erawh tun ṭuma hian chak pawh ni se, final lut tur chuan vawi khat dang chak an la mamawh. Match hmasaa an chak loh avang hian an zinkawng a tawp a, final thleng lo mah se tualchhung basketball inelna sang ber an hmachhawn hmasakah an ti ṭha thawkhat hle.