Hripui vei Djokovic a inchhir

Novak Djokovic-a'n Covid-19 a kai a, hripui hian a nupui Jelena pawh a hmaih bik lo. Serbian star hian coronavirus an kai avangin hrehawm a ti a, inelna an siam chawp 'Adria Tour' vanga hri a darh avangin ngaihdam a dil.

Adria Tour-a inlan Djokovic bakah hian Grigor Dimitrov, Borna Coric leh Viktor Troicki te chuan hri leng hi an kai a, inelna pangngai awm loh laia tournament an siam chawp vang leh tennis bakah thildang hrang hrang langsar taka an tih ho avangin sawisel an hlawh.

World number 1 Djokovic-a'n hri a vei thu hi Thawhlehni zan khan puan chhuah a ni a, ni 14 chhung khung hran a ni dawn a, ni nga hnuah a dinhmun endik leh a ni bawk ang. Serbian tlangval hian natna a nei lem lo a, dam leh thuai tura beisei ni mah se inkhel leh tur chuan hun a mamawh deuh ang.

Nikum tawp lama China aṭanga hri leng rawn chhuak coronavirus chuan kumin tir lamah Europe khawmualpui a run a, ram ropui United States pawh an bang bik lo. Hri leng vang hian March thla hnu lamah chuan tennis inelna pangngai a awm tawh lo.

Clay court season an hmang dawn lo a, inelna lian French Open erawh May thlaa khelh tur ni mah se September thla atan an sawn hial. Grass court inelna pawh a awm thei ta lo; Indopui II-na hnua a vawi khat nan Wimbledon chu ṭhulh a ngai.

Hard court inelna lian US Open erawh a hun pangngai August 31 aṭang hian New York khawpuiah khelh tum a ni a, inkaihhruaina dan leh hrai siam thar khirh tak a awm bakah a hmuna entu fans an awm dawn lo - stadium a ruak dawn tihna a ni.

Association of Tennis Professionals (ATP) leh Women's Tennis Association (WTA) te chuan August thlatir lam aṭangin inelna buatsaih leh an tum. Mipa inelna Citi Open chu Washington-ah August 14 aṭangin khelh a ni ang; US Open inbuatsaihna tur a ni dawn.

Thla thum chhung vel chu infiamna khawvel a chawl ṭhuap a, tennis pawh khelh theih a ni lo. Player-te chu mahni chenna inah awmin an taksa sawizawi lai chu social media lamah an tarlan ṭhin bakah ṭanpui ngaite tan an che chhuak nasa hle.

Midang ṭanpui nana sum pe chhuak hnem tak Djokovic tha za a awm mai mai thei lo. Phungbawm sawmin ATP inelna hnuaia mi ni lem lo 'Adria Tour' an buatsaih. Player pariat an tel a, khawpui pathumah khelh tur niin an inkhelh kual hnuah a sang pahnihin final khelh tura tih a ni.

June thlatir khan a thawh khatna chu Djokovic-a tennis centre awmna Belgrade, Serbia-ah khelh a ni. Kar hmasa khan Zadar, Croatia-ah a thawh hnihna an khel leh bawk; inelna an neih ṭum hnihah hian a hmuna entu 4000 vel ve ve an awm!

Croatia rama inelna an neih lai hian Dimitrov chu khawsik vangin a match hnihna a khel thei lo a, a inhnukdawk. Bulgarian tlangval hian Covid-19 a kai tih hmuhchhuah a ni a, a hnuah Djokovic nena inhmachhawn Troicki pawhin a kai tih an hmu chhuak. Anni pahnih bakah Djokovic leh Coric te pawhin an kai leh bawk.

Adria Tour-ah hian social distancing zawm a ni lo a, player inkhel ve lote pawh a sirah inhnaih tak takin an ṭhu. A hmuna entu an awm bawk avangin sawiseltu an tam a, tennis bakah hian basketball an khel; zan lamah intihlimna 'party' an buatsaih bawk!

Djokovic-a'n hri a kai tih an hriat hma, Dimitrov, Coric leh Troicki ten an kai tih an hriat tawh lai khan British number 1 Dan Evans chuan na takin a lo sawisel tawh. Evans chuan, "Novak hian a thil tihsualah mawhphurhna a la ngam tur a ni," tiin a lo sawi tawh.

Australian tlangval, tennis a khelh thiam bakah a nungchang maksak vanga hriat hlawh Nick Kyrgios pawhin Adria Tour an neih chu atthlak a tih thu a lo sawi tawh. Hri an vei tih a hriat hnuah pawh a dim chuang lo, "Thil atthlak, pawisak nei lo," tiin hripui len laia tennis player an party chu a dem hle bawk.

Covid-19 hian thliar bik a nei lo, kar hmasa lawka Djokovic-a'n thla a lakpui Serbian NBA star Nikola Jokic pawhin hri a kai tih hi Thawhlehni zan khan puan a ni bawk. Zalen taka an vah vel avang hian an hnaih chilha awmte chu endik vek an ngai dawn tihna a ni.

Ṭhian duhtakte u, Belgrade lamah kan kir leh khan kei leh Jelena chu Covid-19 kan kai em tih enfiah a ni a, vanduai thlak takin kan kai; kan fate erawh endik ni ve mah se hri leng hi an kai lo hlauh. Ni 14 chhung chu khung hran tur kan ni a, ni nga (5) hnuah kan dinhmun endik zel a ni ang.

Inelna kan buatsaihin harsatna a thlen avangin a pawi ka ti takzet, thla liam ta chhunga kei leh tournament buatsaihtu ten kan thil tih zawng zawng kha thinlung tak leh uluk thei ang bera tih a ni. Hun harsa kan tawh karah khan kei leh midangte chuan taksa hrilsel bakah rilru lam engthawl leh zalen zawka hun kan hman theih kha kan beisei a ni.

Amaherawhchu, hun rei lote hnuah kan thil tih kha a dik lo a ni tih a rawn lang ta. Kan tih sualin a nghawngte laka ka inthiam lohzia leh inchhirzia chu thua sawi chhuah mai thei pawh a ni lo hial.

Adria Tour-a rawn kal leh inhnamhnawih zawng zawngte chu hri an kai em tih in enfiah vek turin ka duh. A bik takin Belgrade leh Zadar a mi te tan hriselna lam kaihhnawih mamawh chu theihtawpin kan thawh ve ang, inelna neih hmabak pawh tih tawp nghal vek a ni.

Mitinin hriselna ṭha leh thlamuanna in neih leh thuai ka duhsak che u a, chutiang a thlen theih nan chuan ka ṭawngṭaipui bawk che u.