Rafael Nadal a inhnukdawk

Wimbledon semifinal a lut a, champion turin match hnih chiah a hmabak tawh. Mahse, Rafael Nadal chu a dul hliam vangin a inkhel chhunzawm thei dawn lo, loh theih lohna avangin a inhnukdawk ta zawk.

Nadal a inlan theih dawn loh avang hian, a khingpui tur Nick Kyrgios chuan inkhelh hah ngai loin final a lut. Australian tlangval tan Grand Slam final hmasa ber a ni dawn, a tan chuan Nadal inkhel thei lo hi chanchin ṭha a ni ngei ang.

Nizan khan seeded pakhatna Novak Djokovic leh Cameron Norrie ten semifinal an khel a, a chak zawkin Pathianni zanah Kyrgios nen final an khel ang. Djokovic hi champion lai a ni a, Norrie erawh Wimbledon a khelh tawha a thlen san ber ṭum a ni.

Grand Slam vawi 22 champion tawh Nadal hian season a hmang ṭha. Australian Open leh French Open nomawi a chawi tawh. Kum khat chhunga major title pali kawl khawm a tumna chu a hlawhtling thei dawn ta lo.

Spanish tlangval Nadal chuan, "Thutlukna siam tur hian nilengin ka inngaihtuah. Uluk taka ka ngaihtuah hnuah inkhelh loh a ngai ta zawk, ka dinhmun avang hian pawi ka ti takzet," a ti a, a taksa dinhmun a ngaihpawimawh a ngaih thu a sawi bawk.

Quarterfinal-a Taylor Fritz a hneh ṭum pawhin Nadal hi a buai tawh. Set hnihna an khelh zawh hnuin a dul hliam vang hian enkawl lailawk a ngai hial a, a hnuah inkhel chhunzawm thei mah se 100% a dam chu a ni thei lo.

Match khelh zawh hnuah Nadal hian semifinal khelh theih a beisei thu a sawi a, thutlukna a siam mai lo. Mahse, a hliam endik a ni a, ngun taka a ngaihtuah hnuin Wimbledon chu ui tak chungin a mangṭha ta zawk a ni.

Kum 36 mi Nadal chuan, "Hun rei vak lo kaltaah kha chuan kephah hliam vangin ka buai, ka na a dam hnu lawkah hliam dang vangin ka buai chhunzawm leh, ngaihtuahna hman thiam pawh a harsa ve hle.

"A pawimawh ber erawh nomawi ni loin hlimna leh hriselna a ni a, chuvangin taksain nasa taka a tawrh zel ai chuan tournament khelh loh rih mai hi ka tan a ṭha zawk," tiin a sawi a, season tawp lamah erawh a inlan leh hman a beiseiawm.

Tun season chhunga Grand Slam hnuhnung ber US Open chu September thlaah khelh a ni dawn. Tuna a lan dan chuan Nadal hliam hi a dam hman tura ngaih a ni a, chutih rualin masters tournament dangah erawh a inlan theih a rinawm ta lo.