Ronaldo-a'n United squad a la zawm lo

Manchester United chhuahsan duhtu Cristiano Ronaldo chuan Thailand-a pre-season tour nei tur Red Devils squad a la zawm lo a, nimina Bangkok pantu United players zingah a la tel ve lo.

Ronaldo hian chhungkaw buaina chhuanlamin Carrington-a United pre-season training chu a zawm duh lo a, Bangkok zin tur zingah a tel beisei mah se United lam hian an player chhuanvawr hi a chawlh an phalsak leh ta zawk.

United hian Thailand-a pre-season tour an neih zawhah Australia an pan lehnghal dawn a, he thu buatsaih a nih lai hian Real Madrid forward hlui hian Australia-ah squad a zawm theih dawn leh dawn loh a la chiang lo.

Pre-season tour-a Ronaldo an hruai theih loh avangin fans tam tak chu United chungah an lungawi lo ang tih a chiang a, Red Devils hian season hman zawh taka goal 24 khungtu Ronaldo an hruai loh avang hian tour-a an sum hmuh tur an chân nualin a rinawm.

Ronaldo hian a phu ang tawka dawr an awm a nih chuan United chhuahsan phal turin Red Devils thuneitute hnenah a dil tawh a, Chelsea chu tun dinhmuna Portuguese forward hnimhnaitu ber an ni.

Portuguese national team hmunpuia training nei mek Ronaldo hi kum 37 mi a ni tawh a, a career tawp lamah Europa League khelh ai chuan Champions League khelh chhunzawm zel a duh - mahse, he thu buatsaih lai hi chuan United lamin Ronaldo hralh tumna an nei lo.