Armed Veng an tla, derby kan hmu dawn lo!

Tualchhung football ngainatu inti tan chuan Armed Veng ṭhatzia a hai theih loh a, champion tura rinkai zingah i lam hmaih a nih ngat chuan Mizoram football i la bel tawk lo a ni ngat ang.

Mahse, football-ah chuan eng pawh a thleng thei tih kha a takin kan hmu leh ta a, LBS Suzuki All Mizoram Inter Village Football Tournament round of 32 aṭangin Armed Veng chu pet chhuahin an awm!

Nimin khan RG Stadium-a inkhelah Armed Veng hi Bungkawn nen 3-3 in an inhnehtawk a, penalty shootout-ah 5-3 in Bungkawn an chak daih!

RG Stadium-a zing lam inkhelah Armed Veng South-in 3-0 in Khawlailung hneh mah se mipui hmuh chak 'Armed Veng derby' kan hmu dawn ta lo.

Chak tum Bungkawn
RG Stadium-ah kawr eng nen Armed Veng ṭantu an pungkhawm a, an veng team hnehna chan lai hmuh tumin an kal khawm - tawnhriat nei ṭha Lalbiakhlua'n minute 18-na lekah goal hmahruai a khung.

Mahse, Armed Veng tlarhnung a pawp a, counter attack-ah Bungkawn an hlauhawm ṭhin - minute 41-naah Ringthansiama'n si phurh a rawn sut a, 1-1 in chawlhlawk an hmang.

Armed Veng an buai rei lo. Inelna ṭantira dam lohna avanga inlan thei lo Lalramchullova'n goal a rawn khung ve leh a, thawm a ṭha leh sawt.

Armed Veng hlim chhung erawh a rei lo - goal an chhuah aṭanga minute rukna lekah Ringthansiama bawkin si phurh a sut a, Bungkawnin an phur thar!

Barakhaih!
Armed Vengin tlawm an tum lo - Hlutea'n minute 64-naah an goal thumna a khung a, chak tura ngaih an ni tawh. Mahse, Bungkawn leh Ringthansiama ten ngaihdan dang an nei a, minute 72-naah si phurh an sut!

RG Stadium-ah fan-ten mak tiin inkhel an thlir a, Armed Veng fans an mangang, Bungkawn an phur thung.

Penalty hmangin ṭhum an vawr ta a, 5-3 in Bungkawn an chak zui a, Armed Veng an hawihai.

Armed Veng coach Lalbiaksanga (BS-a) a inringtawk a, Mizoram Police coach hian Armed Veng South nen derby an khelh ngei beiseiin Gokulam Kerala defender Zodingliana Tochhawng leh Indian Arrows midfielder Lalchhanhima Sailo te chu squad-ah pawh a dah lo!

Armed Veng coach Bsa chuan, "Zanah fixture a rawn danglam. Fixture hmasaah hnehna kan chan chuan a tuka inlan leh nghal tur kan ni a, hei vang hian Adinga leh Chhantea kan chawlhtir a, kan tisual. Bungkawn hneh kan inbeisei vang a ni tel pakhat a, kan zuam sual a ni," tiin Vanglaini a hrilh.

Thawhṭanni hian Round of 16 inkhel en turin Bungkawn mipui Lammualah football vangin an pungkhawm ngei ang - Bungkawn tan thil thleng khat a ni - an tlem hauh lo ang.

AVS an chak e
Armed Veng South-in thingtlang team ṭha Khawlailung chu 3-0 in an sawp a, round of 16 an inpetkai.

Jamshedpur defender Laldinliana Renthlei hoa inlan AVS-in goal an khung hma a, Lalruatkima Royte chuan minute 17-na lekah goal hmahruai a khung.

First half-ah goal dang a lut lo a, chawlhlawk hman hnuah pawh Khawlailung an insiamṭha chuang lo. MPL-a tawnhriat nei ṭha Lalrammuan-puia'n second half-ah AVS tan goal hnih a khung ve leh a, 3-0 in an chak.

Armed Veng South hi team 'rual' tak an ni - captain Ramdina'n a ho a, an zavai deuhthaw hian ṭhian inkawm chho rual an ni a, an naute rualin an rawn zawm ve chiah bawk - talent an nei ṭha. Kumin hi Armed Veng South kum a ni dawn em le?

Thenzawl West 'vannei' an ni lo

ISL leh I League player tamna ber Durtlang an hneh avanga ngaihven hlawh Thenzawl West an kal zel a, vanneih vanga round of 32 lut an ni lo tih pholangin Tuithiang chu 2-0 in an hneh - Lalromawia leh Lallawmkima ten second half lamah goal khat ve ve an khung.

Thenzawl hian Jeje Lalpekhlua enkawl, ISL leh I League player paruk kawltu Durtlang an hneh hnuah khan team ṭha College Veng, Saron Veng leh Tuithiang an hneh leh tawh a, champion an sawi ri ngam tawh.