Champion beisei Bawngkawn an tla!

Mizoram football-a hming langsar ni bik lo Ramhlun North-in sulhnu chhuan tham hnutchhiah an duh a, nimin khan LBS Suzuki All Mizoram Inter Village Football Tournament-a champion beisei Bawngkawn LC chu 1-0 in an hneh!

Bawngkawn hian Ningani khan team ṭha zinga ngaih Hlimen chu 7-0 ngawtin an sawp a, Mizo striker ṭha MS Dawngliana'n goal li a khung bakah Isak Vanlalruatfela'n hattrick a siam bawk.

Mahse, Ramhlun North-in Mizo player ṭha rual awm khawmna veng Bawngkawn chu minute 65-naa K. Lalrosanga a goal hmangin an hneh a, last 16 an khel dawn.

F. Lalrozama enkawl team hian Dawngtea leh Odisha forward Isak-a bakah, tawnhriat nei ṭha Ronald Zothanzama, Imanuel Ṭhazuala leh KC Larchhuakmawia te ho bul an ṭantir thei.

Mahse, a tawpa chak tur tehna 'goal' an khung miau loh avangin Bawngkawn an tlawm a; player tawnhriat nei Chhuantea leh keeper Ṭanpuia hoa inlan Ramhlun North zawk an tlang.

Thawhṭanni lamah Lammualah Round of 16 an khel dawn a, veng lian Ramhlun North fans an ṭhahnem dawn.