Barca-in Lewandowski lakluh an tum

Barcelona chuan Bayern Munich striker chhuanvawr Robert Lewandowski lakluh ngei an tum tih an pholang a, German champion hi sum ṭhahnem tak nen an dawr.

Kum 33 mi Lewy hian kum 2014 aṭang khan Bayern tan hian a khel tawh a, mahse, May thla khan German club-a a hun chu a tawp tawh thu a sawi.

Barca hming a lo lang vat a, Poland international pawh hian zawm ngei a duh - Catalan club-in Lewy an dawrna zat hi puang lem lo mah se khawthlang media te chuan pound maktaduai 33.8 pek phawt a, a khelh ṭhat dan a zira £4.2mtd pek belh turin Bayern hian an dawr niin an sawi.

Lewandowski hian season hmasa khan inelna hrang hrangah match 46 khelin goal 50 ngawt a la khung thei a, mahse, German club-ah kum khat chiah contract a nei tawh a, a kum a tam ve deuh tawh bawk avangin Barca dawrna zat hi a awm viau.

Catalan club president Joan Laporta chuan, "Lewy lakluh tumin kan dawr tawh a, min chhanletna kan nghak mek. Chhanna duhawm tak kan dawn theih ka beisei," a ti.

Tun hnaiah Bayern hian Lewy an hralh dawn chuan, a hlawma sum dawn nghal vek an duh nia sawi a awm a, sum lama Barca dinhmun chiang lo chuan a tihlauthawng niin khawthlang media-te chuan an tarlang.

Mahse, Laporta chuan, "Khawilai emawa thuthang satliah, fiamthu mai mai a nih ka ring a, Bayern aṭanga thu chhuak a ni thei lo. Kan tih tur tiin kan ngamna zat kan sawi tawh a, an ngaihtuah ve tawh ang chu," tiin a sawi.

Lewy hian Bayern-ah season riat hun a hman chhungin match 252 khelin goal 238 a khung a, Bundesliga nomawi vawi riat chawiin Champions League (1), DFB-Pokal (3), DFL-Supercup (5), UEFA Super Cup (1) leh FIFA Club World Cup (1) ah te champion nomawi a chawipui bawk.