Anfield-ah Gomez a cham zel dawn

Liverpool defender Joe Gomez chuan Merseyside club-ah khelhna hmun chang tam tawk lo mah se Anfield-a châm chhunzawm zel a thlang a, kum nga chhung atan contract thar a ziak.

Kum 25 mi defender hian June 2015 khan Charlton Athletic aṭangin Reds hi a zawm a, hetihlaia a man zat hi pound maktaduai 3.5 a ni - Reds tan hmun pawimawh chang chho mah se hliamin a tlak buak ve reng a, tun hnaiah a inkhel tam tawk lo.

Season hman zawh takah pawh khan Gomez hian inelna hrang hrangah match 21 chiah khelin assist vawi khat a nei a, heng zinga match 10-ah hian bench aṭanga luhtir a ni.

Khup leh kerek hliam vanga talbuai ṭhin Gomez chuan, "Ka la naupangin, hmabak duhawm takin min hmuakah ka ngai a, inzir belh zel turin hun ka la ngah tawk. Hun duhawm tak tawng turin he hmunah hian manager, coaching staff leh team mate ka nei ṭha tawk a ni," a ti.

Newcastle United, Aston Villa leh AS Roma-in lakluh tuma an hel nia sawi defender hian Reds-ah hmun chang tam lo mah se manager Jurgen Klopp-a'n cham turin a duh a, season tharah match tam zawk khelhtir a tum niin an sawi.

Liverpool hian centre back-a khel turin Ibrahima Konate, Joel Matip leh Virgil van Dijk an nei a, Gomez tan hmun pawimawh chang turin beih fe a ngai ang.

Reds boss Klopp chuan, "Joe-a duhawmna em em pakhat chu la naupang hle mah se tawnhriat a ngah tawh em em hi a ni a, chu thil inkawp chu a hlu takzet.

"Hmanni lawkah kum 25 a tling a, mahse, Reds ka zawm hmain he hmunah hian a awm tawh a, Hendo (Jordan Henderson) leh Millie (James Milner) tih lohah chuan he club-a awm rei tawh ber player a ni hialin ka hria," a ti.

Klopp chuan sawi chhunzawmin, "A ṭhatna hrang hrang kan sawi a, chung zinga a lawmawm ber erawh a ṭhat lai ber a la tawng chho dawn chauh hi a ni a, kan hnena a vanglai a hmang tur a liama lawmna ka nei lo," a ti a, Gomez an chelh thei chu a hlim thu a sawi.

Charlton Athletic youth system chhuak defender hian Liverpool tan Champions League, Premier League, FA Cup, Carabao Cup, UEFA Super Cup leh FIFA Club World Cup-ah te champion nomawi a chawi tawh a, a hlawhtling hle.

England tana vawi 11 inlan tawh Gomez hian Liverpool tan inelna hrang hrangah match 142 khel tawhin assist vawi nga a nei tawh a, a career-ah red card hmuh a la nei lo.