T20: India-in England an sawp

England-a tour nei mek India chuan T20 series khelh tura an match hmasa berah England chu run 50 zetin an sawp a, Ageas Bowl, Southampton-ah England fan-te an hawihai.

India tan Hardik Pandya chu player langsar a ni a, kum 28 mi all rounder hian run 51 zet a siam bakah wicket li a la bawk - England-in Pandya an ngam lo a ni ber!

England tan erawh white-ball (ODI & T20) captain thar Jos Buttler hnuaia an match hmasa ber a ni a, Buttler tan ngaihtuahna thar sen a ṭul takzet tih a lang.

Thutlukna dik
Ṭhumvawrah India an vannei zawk a, Southampton khawpuiah Men in Blue captain Rohit Sharma-a'n vuak hmasak a thlang a, kum 35 mi batsman hian duh a thlang sual lo.

Rohit Sharma hi Ishan Kishan nen an rawn ding chhuak a, Kishan-a'n run riat lek a siam tihin chhuahsan mah se Rohit hian run 24 a siam a, Deepak Hooda (33 runs) leh Suryakumar Yadav (39) ten an rawn ti ṭha viau bawk.

India dinhmun chawisangtu bera chhal ngam erawh Hardik a ni a, Gujarat tlangval hian ball 33 lekah run 51 ngawt a rawn siam - over 20 an khelh zawh meuh chuan India-in run 198 an siam a, wicket riat an hloh.

A hming Hardik
England tan Jason Roy leh captain Jos Buttler an rawn ding chhuak a, hmabak a ko hle. Mahse, a tir aṭangin England an chesual nghal a, Roy chuan ball 16 ngawt a hmachhawnah run li chiah siamin a thi a, wicket latu chu Hardik a ni.

Captain Buttler phei chuan pressure a zo lo em ni chu aw, tih turin beisei a phak lo a, a ball hmachhawn hmasak berah Bhuvneshwar Kumar ball vawmah a out nghal - run a siam lo!

Dawid Malan chuan ball 14 lekah run 21 rawn siamin an dinhmun chhe lutuk tur a rawn chawikang a, mahse, Hardik hmaah bawk a 'out' ve leh a, kum 28 mi Hardik hian Liam Livingstone chu run siam miah loin pavillion-ah a thawn kir bawk.

Beiseina tlem
England tan Harry Brook (28 runs) leh Moeen Ali (36) ten an dinhmun an rawn chawi kang viau hman a, mahse, anni pahnih pawh hi Yuzvendra Chahal ball vawmah ve ve an out.

Chris Jordan (26 runs) chuan a team tan beiseina a rawn siam ve leh a, mahse, a tawp thleng a dam chungin Sam Curran (4), Tymal Mills (7), Reece Topley (9) leh Matt Parkinson (0) ten awmze nei tham run an siam lo a, over 19.3-ah dinpui tur a nei tawh lo a, England an tlawm - India tana T20 match hmasa ber kheltu Arshdeep Singh chuan wicket hnih a la.

England hian run 148 chiah siamin wicket 10 an hloh a, captain Buttler leh a ṭhianten an tihdik loh lai enin insiamṭhat an tum ang - Hardik leh India an ngam loh nawn chuan an mualpho a zual dawn.

India & hmabak
Men in Blue hian nikum khan England-ah hian tour an nei tawh a, mahse, an test match hnuhnung ber chu Covid-19 vangin cancel a ni a, tun ṭum an zinah hian match ngana hi an khelh chhunzawm a, India an tlawm.

T20 lamah India an insawrbing zui a, an match hmasa berah an chak nghal - India leh England hian T20 match hnih an la khel leh dawn a, zanin dar 7:00 hian match hnihna an khel dawn a, England hi an tlawm leh chuan India-in twenty20 series chu an la ang.

Team pahnih hi ODI match thumah an intawng dawn bawk a, July 12-ah ODI match an khel ṭan dawn - India tan England tour a hlawhtlin theih nan T20 series lak hi hna hmasaa neih a ṭul.