India tan Siami goal a tawk lo

Women's FIH Hockey World Cup 2022-ah India nula te New Zealand lamak 4-3 in an chak lo, match thum an khelh tawhah chak ni hmel an la hmu lo. Duhthusam ang result la nei lo mah se, an tan tournament erawh a la tawp mai lo.

India hi pool C lama pahnihna Spain nen zaninah an inkhel leh dawn, a chak zawkin quarterfinal-ah Australia an hmachhawn ang. Australia hi pool D hmahruiatu ni chunga tlang an ni a, an tan 'crossover' khelh ve kher a ngai lo, knockout stage an lut nghal a ni.

Ningani zan pool B inkhelah India hian Vandana Katarya hmangin goal an nei hmasa, mahse New Zealand lamin Olivia Merry goal hnih bakah Tessa Jopp leh Frances Davis te goal hmangin an chhanglet.

Mizo nula Lalremsiami Hmar leh Gurjit Kaur ten India tan khung ve bawk mah se, hnehna chan nan a tawk zo ta chuang lo. India hi pool B-ah pathumna an ni a, an chungah hian New Zealand leh England te an awm.

Group tin hmahruaitu hian quarterfinal an lut nghal. Pool B aṭang hian New Zealand an tlang fel tawh, pahnihna England leh pathumna India te hian pool danga mite an hmachhawn kual leh a ngaih phah ta a ni.