Juve-ah Di Maria a kal

Angel Di Maria chuan Juventus a zawm. Paris Saint-Germain tana a contract a hman zawh hnuah chhuah zalen a ni a, man nei loin a duh zawng club a zawm thei - a tan Turin club hi hmun ṭha a ni tura ngaih a ni.

Argentina international winger hian nimin khan medical test a nei, kum khat daih contract a ziak dawn. Chanchinbu i chhiar hunah chuan Italian club hian inremna an ziah felpui hman tawh ang.

Di Maria hi kum 34 mi a tawh tawh, kumin tawp lama neih tur Qatar World Cup a la thlir, football inelna lian khel tur chuan club huangah inelna sang hmachhawn a pawimawh tih a hria, a khelh tam theihna tur hmun ni bawka ngaih Juve hi a thlang a ni.

PSG tan Di Maria-a'n inelna hrang hrangah match 295 a khel a, goal 95 khungin assist vawi 112 a nei bawk. Season sarih hun a hman chhungin Ligue 1 nomawi panga leh French Cup vawi nga a chawipui bawk.

Nomawi chawi hnem mah se an duh ber Champions League nomawi erawh a chawipui lo. UCL-a an thlen san ber chu 2020 kha niin final an thleng a, nomawi inchuhna inkhelah Bayern Munich an ngam lo thung.

Italian club ṭha Juventus hian tun hnaiah Inter Milan leh AC Milan te an tluk lo, kum zawnin Serie A nomawi an chawi phak lo. Tun hma lama an ropuina ang kha neih let leh an tum a, tun nipui bazar chhungin Manchester United tana contract hmang zo Paul Pogba pawh an lalut dawn.