FA Cup Quarterfinal Club lian an la dam, a hmuhnawm dawn

Khawvela football inelna upa ber FA Cup quarterfinal chu zanin aṭangin khelh a ni dawn. Zanin dar 10:00-ah Norwich City-in Manchester United an mikhual ang a, Ole Gunnar Solskjaer hote tan nomawi beisei tur a la awm.

Pathianniah inkhel dang pathum a awm. Tlai dar 5:30-ah Sheffield United leh Arsenal, zan dar 8:30-ah Leicester City leh Chelsea bakah zan dar 11:00-ah Newcastle United leh Manchester City te an inkhel dawn.

Quarterfinal khel tur zingah Premier League 'big 6' tia chhal pali Arsenal, Manchester United, Chelsea leh Manchester City te an la awm. Heng club pali hi an chak vek thei a nih chuan FA Cup semifinal-in ngaihven a hlawh lehzual sawt dawn a, chutihrualin khualmualah vek an khel dawn tih hriat a ṭha.

Norwich manager Daniel Farke chuan, "A nihna tak thlir chuan Premier League khelh zel emaw FA Cup champion emaw hi thil theih a ni lo. Chutihrualin kawr eng kan hak a, beiseina kan neih chhung chuan theihtawp kan chhuah zel ang," tiin Everton an hneh loh zawhah a sawi.

Canaries hi Premier League table mawngphahah an awm a, an chunga awm club pathum chu point rukin an pha lo. League match sarih khelh tur a la awm avangin beiseina tlem an la nei a, FA Cup-ah risk an la ngam ang em tih chu zawhna awm a ni. Norwich City-in 'risk' an la ngam a, FA Cup an ngai pawimawh a nih chuan Man United tan a awlsam kher lo ang.

Chutihrualin Ole Gunnar Solskjaer-a hote hian tun season-ah Norwich hi league match vawi hnihah an hneh ve ve a, match 13 chhung hneh loh an tawn tawh loh avangin chak tura rinkai an ni. United hian an match hnuhnung berah Sheffield United 3-0 in an sawp a, match khelh tur a la tam avangin an insiksawi hret erawh a rinawm thung.

Anthony Martial-a'n Blades lakah hattrick a siam a, Marcus Rashford leh Mason Greenwood te nen tun season-a an khung zat belhkhawm chu goal 50 a ni. Martial leh Rashford ten goal 19 ve ve an khung tawh a, kum 18 mi Greenwood-a'n senior team tana season tluana a inlan hmasak berah goal 12 a khung ve der tawh. United-in tlarhma an nei ṭha a, Solskjaer-a'n nomawi lian tham chawi theihna hun ṭha a neih hi bawhpelh a duh lo ang.

Sheffield United-in league match hnuhnung berah keeper Dean Henderson leh defender John Egan te an chhawr thei lo a, Arsenal nen erawh an player pawimawh te hi an chhawr thei dawn. Gunners hian Kieran Tierney, Gabriel Martinelli, Bernd Leno leh Pablo Mari te hliam vangin an hman theih a rinawm lo a, Blades tan lawmna tur a tam hle.

Amaherawhchu FA Cup aṭanga teh chuan Arsenal hi English club ropui ber an ni a, vawi 13 an champion tawh. Inelna hnuhnung parukah vawi thum an champion a, Gunners dah hniam theih a ni lo. Covid-19 buaina vanga inelna ṭan a nih leh hnuah Mesut Ozil a la inlan lo a, FIFA World Cup-a champion tawh midfielder hi a inlan a nih chuan Mikael Arteta hote hi team dang daih an ni thei ang.

Chutihrualin Sheffield United tan Champions League beiseina a thamral ṭan a, chuvangin relegate a hlauhawm loh bawk avangin FA Cup-ah an insawrbing dawn. Manchester United an hmachhawn ṭumin an tlarhnung a pawp hret a, amaherawhchu Henderson leh Egan te hian an hnawh phui theih a rinawm. League-ah Blades hi Gunners chungah an awm a, Bramall Lane-a inkhelh tur a nih bawk avangin Arsenal dah san bik a rem lo.

FA Cup quarterfinal match li zingah Leicester City leh Chelsea inkhel tur hi intum tawk ber tura ngaih a ni a, Blues hi Manchester City hneh zo hlim an nih avangin King Power Stadium-ah pawh inringtawk takin an lut thei ang.

Foxes hi inelna ṭan leh hnuah an la che ṭha lo a, nikum kum tawp lama match riat chhung a zawna goal khung thei Jamie Vardy-a'n goal khung a harsat rih bawk nen Chelsea phur lai mikhual turin an inpeih tawk lo a tih theih. Chutihrualin Brendan Rodgers hote hi Blues aiin hahdamna hun an ngah zawk.

Chelsea erawh Champions League khel tura an dinhmun a la him loh bakah an match hnuhnung berah Manchester City ber kher an hmachhawn avangin player ṭha ṭhenkhat hahdamtir a ṭul dawn. Season tawp lam hi manager 

ṭha tam tak chetsualna ṭhin a ni a, Frank Lampard tan fiahna hun ṭha a ni ang.

FA Cup champion lai Manchester City hi tun season-ah pawh champion tura rinkai ber an ni a, season liam ta khan final-ah Watford 6-0 zetin an sawp. Pep Guardiola hote hian Premier League nomawi chu Liverpool lakah chan mah se League Cup an champion tawh a, FA Cup hum him thei dinhmunah an la ding bawk.

Man City-in squad an nei chhah a, Ningani zana Chelsea nena khel lo zawng pawh inlan se Newcastle United lakah rinkai an ni zawk tho ang. Chutihrualin Blues lakah City an tlawm a, Newcastle tan fuihtu ṭha tak a ni ngei ang. Steve Bruce-a hote an mual St. James' Park-ah an khel dawn a, Man City hneh turin sa huai an ser ang.