Krawczyk leh Skupski tan nomawi

American-British duo Desirae Krawczyk leh Neal Skupski te chuan Wimbledon mixed doubles title an kawl lai an humhim. Ningani zan final inkhelah Matthew Ebden leh Sam Stosur te ṭang dun chu 6-4, 6-3 a hnehin nomawi an chawi.

Seeded pahnihna Krawczyk leh Skupski te hian hnehna chang turin darkar khat leh minute 27 hun an hmang a, stadium hmingthang Centre Court-a inkhel entute ṭan an hlawh hle, an chet fuh laiin thawm a ring ṭha thei hle.

Kum 26 mi Skupski chuan, "A nihna takah chuan inkhel tir lamah khan kan talbuai deuh a, kan hlauthawng bawk. A rei hnuah erawh kan duh angin inkhel kan thunun thei, hun pawimawh laia an service kan chhuhsak thei ṭhin kha a hlu," tiin a sawi.

Mixed doubles lama chak lo lama mi Ebden-a hian mipa doubles lamah erawh hlawhtlinna a chang. Australian tlangval hian a ṭanpui Max Purcell nen Rajeev Ram leh Joe Salisbury te ṭang dun chu hnehin nomawi an chawi ve thung.