Forest-in Liverpool defender Neco la dawn

Premier League kai thar Nottingham Forest an bazar zel a, Wales defender Neco Williams chu Liverpool aṭanga pound maktaduai 17-a lalut turin Merseyside club hi inremna an neihpui.

Kum 21 mi right back hian January khan loan-in Fulham a zawm a, Championship club hi Premier League khel turin a kaipui a, tunah chuan Forest a zawm dawn.

Liverpool academy chhuak Neco hi Reds fan-te chuan a chungah beiseina an nei sang hle - mahse, Trent Alexander-Arnold awmna Liverpool-ah a tan hmun chan a harsa a, a khelh phakna tur zawngin a chhuak dawn ta.

Wales tana vawi 20 inlan tawh defender hian Euro 2020-ah khan an ram team a kaipui a, World Cup a khelhpui leh dawn bawk - a kum zat ngaihtuahin tawnhriat a nei ṭha a, Forest tan a ṭangkai khawp ang.

FA Youth Cup-a Liverpool tana nomawi lo chawi tawh defender hian Reds senior team tan match 33 a khel hman a, goal khung lo mah se assist vawi ruk a nei.

Premier League leh FIFA Club World Cup-ah Reds a champion pui a, season hmasa khan Fulham chu Championship nomawi a chawipui bawk - Fulham tan match 15 khelin goal hnih a khung a, assist vawi hnih a nei bawk a ni.