Ajax-ah Bergwijn a haw

Tottenham Hotspur winger Steven Bergwijn chuan youth level-a a lo khelh tawh ṭhinna Ajax a zawm a, Dutch club-ah hian kum nga cham tura contract ziakin, a man zat hi pound maktaduai 26.4 a ni.

Netherlands tan vawi 22 inlana goal ruk khungtu Bergwijn hian PSV Eindhoven aṭangin Spurs hi January 2020 khan a zawm a, London club hian £26.7mtd-a lalutin a chungah beiseina sang tak an nei.

Mahse, Bergwijn hian Spurs-ah beisei a phak lo a, match 83-a khelhah goal riat khungin assist vawi 10 a nei a, a tlangnel tawhna hmun Eredivisie bawk khel turin a haw leh ta zawk.

Ajax coach thar Alfred Schreuder chuan, "Player theihna nei sang tak a ni a, hlawhtlin duh mi leh goal bawh na tak a ni. Ani ang player kan lalut thei hi ka lawm a, kan team quality a tisang lehzual a ni," a ti a, a player thar hi Ajax innghahna khawpui Amsterdam-a piang a ni.

Kum 49 mi Schreuder hian Manchester United pan ta Erik ten Hag hmun ruak a luah dawn a, kum 49 mi coach hi Dutch mi tho niin, Twente leh Ajax-ah assistant coach anga league nomawi lo chawi tawh a ni a, a mikhual lo ang - season hmasa khan Club Brugge chu Belgian top flight league-ah a champion pui.