Tihsual aṭangin zir tur kan nei - Leclerc

Charles Leclerc chuan British Grand Prix neih zawh taka an tihsual siamṭhat a duh a, hun kal tawh lama an chet fuh lohna chuan tun hma aia chakna ṭha zawk a siamsak ngei a beisei thu a sawi bawk.

Tun season intlansiak an neih tawh chinah Leclerc hian team tihsual a tuar fo, chak thei dinhmuna a din lai pawhin thutlukna siam sual vangin ṭum hnih chu point a hmu lo, hei hian driver championship lama a dinhmun pawh a hnuk hniam.

Kum 24 mi Leclerc chuan, "Siamrem ngai tlemte a awm, chumi kan tifuh thei a nih chuan buaina a awm lo ang. Kan tihsual leh siamṭhat ngai lai chu kan hria, driver bakah team lam pawhin an tih tur an hre chiang.

"Kan ṭhat dan taka kan tlan thei a nih chuan team dang aiin kan sang zawk ngei ang, chutih rualin mimal tih ṭhat ringawt a tawk lo. Formula 1 chu driver bakah team inelna a ni," tiin thawhhona ṭha a pawimawh thu a sawi.

Car intlansiakna sang ber hi tun season chhungin intlansiak vawi 22 awm tura ruahman a ni a, inelna vawi 10 an nei tawh. Red Bull driver Max Verstappen chuan hma hruaiin a hnungah a teammate Sergio Perez a awm.

Red Bull driver pahnih hnungah hian Leclerc a awm, an inthlauhna a la tam loh avangin an dinhmun hi la inthlak danglam thei vek a ni. Chuvangin season chawhnu lam an hman hmabak hi a pawimawh hle.

Pathianni zan dar 6:30 hian Red Bull Ring-ah Austrian Grand Prix an tlan dawn. Tlankawng hi Red Bull chetṭhat ṭhinna hmun a ni a, season hmasa pawh khan Verstappen a chak ber; kuminah Red Bull leh Ferrari te chu inel na ber tura ngaih an ni.