Rilru zawng zawng pek a ngai - Conte

Inter Milan coach Antonio Conte chuan match khelh hmabak an la neih hoah chuan 100% rilru pe turin a naute a duh. Pathianni zan dar 1:15-a Parma an lenchilh hunah result ṭha hmuh nghal a beisei bawk.

Conte hian Inter hi dinthar leh a tum a, sum tam tak sengin player pawh a lei bakah a hawh khawm bawk. Season tir lam che ṭha viau mah se a laihawl an pelh hnuah an zuih; an match hnuhnung berah Sassuolo nen an inhnehtawk a, ho lam tak taka goal khung loh an nei.

Italian manager Conte chuan, "Kan tih theih sang ber chu rim taka inbuatsaihna neih hnuah khelmual chhunga rilru zawng zawng pek a ni. Player-te hian inkhelh lai chuan thildang an ngaihtuah hi ka duh lo.

"Kan match hnuhnung berah khan tihsual kan ngah, a hremna pawh kan tuar chiang hle. Inter Milan tana khel an nih chuan an jersey zahawmna pholang ngei turin an khelh a ngai," tiin a naute a kar na hle.

Serie A pahnihna nilai Lazio chu zanin hian an inlan dawn, beisei anga season hmang ṭha lo Fiorentina an mikhual ang. Champion lai Juventus chu nizan khan an inlan a, result kan hre hman lo. Lazio tan Juve chetsual chan a ngai tawh a, an mahni an chet fuh hle a ngai tel bawk.

Lazio coach Simone Inzaghi chuan, "Table en mai chuan kan tan nomawi a hla ta hle. Mahse, khelh hmabak 11 kan la nei a, point hmuh theih 33 a la awm tihna a ni. Fiorentina hmachhawn a hautak dawn, kan theihna zawng zawngin kan khel ang," a ti.