Wimbledon hmeichhe champion Rybakina

Elena Rybakina chuan khawvel barakhaihin Wimbledon title a vaw chhuak. Hmeichhe singles final inkhel hmuhnawm takah Rybakina hian Ons Jabeur 3-6, 6-2, 6-2 in a hneh a, Grand Slam final a khelh hmasak berah hnehna a chang.

Rybakina hi kum 23 mi a ni a, Petra Kvitova (2011) hnu lamah Wimbledon champion ni thei naupang ber a ni. Tun ṭum final-ah hian chak tura rinkai zawk a ni lo, mahse set hmasa ber a hloh hnuah pawh huaisen takin a tho chhuak thei a ni.

Russian nula!
Wimbledon 2022-ah hian indona vangin Russia leh Belarus player tel an phal lo, hei vang hian mipa leh hmeichhe tennis thuneitu sang ATP leh WTA chuan kuminah hian ranking pawh an siam lo, major tournament ni mah se ranking point a nei lo.

Hmeichhe singles champion Rybakina hi Russian nula a ni tlat si! Russia khawpui Moscow chu Rybakina pianna hmun a ni a, junior huangah chuan Russia hmingin a inlan ṭhin, mahse Kazakhstan aṭangin thlawpna a hmu ṭha a, 2018 aṭang khan Kazakhstan hmingin a inlan ta zawk.

Elena Rybakina hi Kazakhstan aiawh chu a ni ngei mai, mahse Russian mi a nihna a bo chuang lo. A pianna hmun chauh a ni lo, a nu leh pa pawh Russian an ni. Tunah chuan Russia hmalakna duh lo em emtu Duchess of Cambridge Kate hnen aṭangin 'Venus Rosewater Dish' a dawng ta si.

Champion thar
World number 23 Rybakina hian tun hmain WTA title pahnih chauh a la dawng, world ranking lamah pawh a tawn san lai berin 12-na a ni phak hram, a sang zual 10 zingah tun hma chuan a la tel phak ngai lo.

Wimbledon bikah phei chuan main draw a khelh phak vawi hnihna chauh a la ni. Final kalkawnga 2019 champion Simona Halep a hneh chanchinte chu titi a tling a, final-a a tho chhuak thei pawh mi mak tih a ni.

Set khatnaah 3-6 in a hniam zawk a, ranking hniam leh player langsar lo zawk a nih avangin a thamral dawn niin a lang hman. Mahse, set hnihnaah a khingpui service a chhuhsak zawn thei a, set hnuhnung berah pawh hun pawimawh laia che fuh thei zawk a nih avangin a dingchang.

A mak asin
Player tam tak chuan hnehna an chan hnuin nasa takin an chak an lawm ṭhin, ṭhenkhat chu court chunga mu tawp pawh an awm ṭhin. Rybakina erawhin engtiang vaka lawm tur nge a hre lo, chung lamah racquet lek chhuakin mipui lam a hawi.

Rybakina chuan, "Engtk niah emaw chuan Wimbledon champion ka lawmna nasa tak in la hmu mai thei, mahse vawiinah chuan a ni lo ang, ka hamhaih rih tlat. Thusawi thei pawh ka ni lo, ka ṭah a chhuak. Ina ka haw hnuah pawh ka ṭah a chhuak reng," a ti.

A naupan lai chuan Rybakina hi gymnast a ni a, vur tawlh lamah a tui bawk, mahse a pa thurawn angin tennis a khel ta zawk. Professional tennis a luhchilh dawnah Russia aiin Kazakhstan Tennis Federation sawmna a thlang ta zawk.

Arab nula Jabeur
Arab infiammi zingah tennis khel ṭhahnem tak an awm ve a, mahse Grand Slam title la thei an la awm ngai lo. Tunisian nula Jabeur hian Arab mi zinga major title la hmasa ber nihna hun ṭha a nei, mahse world number 2 hian a bawhpelh hlauh.

Seeded pathumna Jabeur chuan, "Tun hma chuan, tennis kan en hian English, Spanish leh French ṭawng hmangin fans authawm kan hre ṭhin. Tun ṭumah chuan stadium chhungah Arabic ṭawnga fans au thawm kan hre ve ta," tiin Arabic ṭawngin lawmthu a sawi.

Jabeur hi champion zo lo mah se Arab ramah chuan a lar takzet a, ani pawhin naupang zawk ten infiamna huanga sang tak an thlen theihna tura hma latu leh fuih phurtu nih theih ngei a tum thu a sawi ve bawk - a thlen chin aṭanga hmasawn a tum.