Sterling manah Chelsea leh City inrem

Chelsea chuan Manchester City winger Raheem Sterling lalut turin Premier League champion hi inremna an neihpui ta a, he thuziak i chhiar meuh chuan an inlalut fel tawh hial ang.

Sterling manah hian Chelsea chuan pound maktaduai 50 vel an inseng dawn a, £47.5mtd an pe phawt ang a, a khelh ṭhat dan a zirin £2.5mtd an pek belh leh dawn a ni.

Kum 27 mi forward hian club pahnih inrem hma hian Chelsea zawm a lo remti tawh a, kum nga chhung atan contract a ziak ang a, a ṭul dan a zira kum khat dang pawhsei theih tura tih a ni bawk.

Sterling hi Barcelona, Real Madrid leh Bayern Munich te pawhin lakluh an duh a, mahse, England international hian ram pawna kal ai chuan an ram club tana khelh zui a thlang ta zawk.

City-a kum khat chhung atana contract la nei mek Sterling hian medical a nei leh phawt dawn a, medical hi a paltlang a nih chuan London club player a nih thu puan a ni ang.

Todd Boehly leh a thawhpuiten Chelsea an lei hnuah player langsar lakluh an la nei lo a, Sterling hian London club hi a zawm thei a nih chuan an player langsar lakluh hmasak ber a ni ang.

Sterling hian kum 2015 khan Liverpool aṭangin City hi pound maktaduai 49-in a zawm a, match 339 inlanin goal 131 a khungsak a, assist vawi 95 a nei bawk. Season hman zawh takah khan match 47 khelin goal 17 a khung a, assist vawi kua a nei.

Sterling hi Pep-a'n kum 2016-a City a zawm hnua Manchester khaw club tana goal khung hnem pahnihna a ni a, goal 120 ngawt khungin Sergio Aguero (124 goals) chiah a tluk lo.

City tan Champions League nomawi la chawi lo mah se Premier League-ah vawi li a champion a, Sir Alex Ferguson hunlaia Manchester United player ṭhenkhat tih lohah chuan Premier League-a champion hnem lamah John Terry (5) leh City tana a khelhpui ṭhin Fernandinho (5) chiah a tluk lo a ni.

Premier League bakah hian FA Cup (1), League Cup (4) leh Com-munity Shield-ah te champion nomawi a chawi tawh bawk.

Chelsea hian City defender Nathan Ake pawh lakluh an duh nia sawi a ni a, Pep Guardiola hnuaia hmun pawimawh chang phak lo defender hian a profes-sional career ṭanna club zawm hi a hreh lo niin an sawi.

Blues hian Juventus defender Matthijs de Ligt an thlithlai mek bawk a, Italian club hian an release clause £100mtd aia tlawma hralh an rem ti nia sawi a awm a, Sevilla centre back Jules Kounde hming a la ri ve reng bawk.