Chelsea squad-ah Kante leh Loftus-Cheek tel lo

USA-a pre-season tour nei tur Chelsea squad-ah midfielder N'Golo Kante leh Ruben Loftus-Cheek an tel lo a, Inrinni khan London club hian US hi an pan a, an thleng tawh.

Kante leh Loftus-Cheek zin loh chhan hi Covid-19 hri danna an lak loh vang a ni a, USA sorkar inkaihhruainaah an ram khua leh tui an nih loh chuan, Covid-19 vaccine la kim lo tan an ram a luh theih lo.

Hetihlai hian hliam vanga season hmasa tluan deuhthaw inlan lo Ben Chilwell leh Callum Hudson-Odoi te chu squad-ah an tel a, season hmasa lama loan-a chhuak Conor Gallagher, Billy Gilmour, Ethan Ampadu leh Michy Batshuayi te pawh squad-ah an tel.

Season hmasaa Southampton lama loan-a khel ṭha tak Armando Broja pawhin squad a la zawm lo a, kar lehah Blues squad hi a zawm ve leh ang.

Chelsea hian July 17-ah Club America nen an pre-season match hmasa ber chu Las Vegas-ah an khel ang a, July 21 zingah Charlotte FC nen an inkhel leh ang a, July 23 khian Arsenal nen Florida-ah an inkhel bawk dawn a ni.