Liverpool-in Thailand an thleng

Nipui transfer-a Darwin Núñez an lakluh avanga thawm nei na tak Liverpool chuan nimin khan pre-season match khel turin Thailand an thleng a, July 12 zan dar 6:30-ah Manchester United nen friendly match an khel ang.

Bangkok khawpuia an inlan zawhah Reds hian Singapore an pan lehnghal dawn a, July 15 zanah Crystal Palace nen an inkhel leh dawn. Asia aṭangin Europe lamah an let leh ang a, Germany-ah RB Leipzig (July 21) nen inkhelin, Austria-ah RB Salzburg (July 27) an hmachhawn bawk dawn.

Liverpool hian July 30-ah Manchester City nen Community Shield an inchuh zui ang a, July 31-ah Ligue 1 club Strasbourg nen friendly match khel lehin, July 6-ah Fulham nen season thara an league match hmasa ber an khel ang.

Reds hian Bangkok-ah hian player 37 an hruai a, nipui transfer-a player lakluh Nunez leh Fabio Carvalho te pawh an hruai. Hetihlai hian Aberdeen aṭanga an lakluh Calvin Ramsay erawh hliam tenau vangin an la hruai thei lo thung.

Reds hian player langsar an hruai vek a, Nunez bakah Alisson Becker, Virgil van Dijk, Trent Alexander-Arnold, Andy Robertson, Thiago, Roberto Firmino, Mohamed Salah, Diogo Jota leh Luis Diaz te pawh an zin a ni.