India-in England lakah series an la
England-a tour nei mek India chuan mikhual tlangnel zia an chhuah a, Twenty20 series an khelh chu Inrinni zan khan an la fel der - ram pahnih hi match thuma inhmachhawn tur an ni a, Men in Blue hian Ningani khan hnehna an lo chan tawh bawk avangin series hi 2-0 in an la fel der.
India hian match hmasa zawkah run 50-in hnehna an chang a, match hnihnaah pawh run 49-in an chak - nizan khan T20 series hi khelh zawh a ni a, he thu buatsaih a nih lai hian result kan hre hman lo. India hi match hnuhnung berah hian tlawm pawh ni se, 2-1 in series an la tawh dawn tho a ni.
Edgbaston, Birmingham-a series match hnihna inkhelah India tan Bhuvneshwar Kumar chu player langsar niin, wicket thum a la a, Ravindra Jadeja chuan run 46 ngawt vaw chhuakin, a tawp thleng a dam bawk.
Duh thlang sual
Ṭhumvawrah England an vannei zawk a, captain Jos Buttler chuan vawm hmasak a thlang. Mahse, Buttler hian thutlukna a siam fuh tawk lo - India tana rawn ding chhuak hmasa pahnih captain Rohit Sharma (31 runs) leh Rishabh Pant (26) ten run pangngai tak an rawn siam.
Mahse, batter pahnih an out hnuah India an talbuai a, Rohit leh Pant vawm out tu, kum 34 mi ni chunga England tana a match hmasa ber kheltu Richard Gleeson chuan India chhuanvawr Virat Kohli chu run khat chauh a siam tihin a vawm out zui!
Men in Blue tan Suryakumar Yadav (15) leh match hmasa zawka che ṭha tak Hardik Pandya (12) te an talbuai zui a, India ṭantuten hlauthawng takin inkhel an thlir.
A hunah tak 'Sir'!
Indian cricket fan-ten Sir Ravindra Jadeja tiin Indian all-rounder hi hming lem an pe a, a tirah a chetchhiat vanga koh fiamna ni mah se a chet ṭhat hnu thlengin a ṭha lam zawngin hmansak a ni. India captain ropui ṭhin Mahendra Singh Dhoni chu a hnua twitter kaltlanga Sir Jadeja tih tilartu a ni a, tun thlengin Jadeja chu he hming lem hmang hian a lar.
England lakah pawh a hunah tak 'Sir' a che leh ta a, ball 29 lek a hmachhawnah run 46 rawn vaw chhuakin a tawp thleng a dam a, India dinhmun phet hman dawna lang chu dinhmun pangngai takah a rawn hlangkai.
India hian over 20-ah run 170 siamin, wicket riat an hloh a, England tan fast bowler Chris Jordan chuan over li lekah run 27 chiah pein wicket li a la a, Gleeson chuan wicket thum a la bawk.
Nang Bhuvneshwar!
Jadeja -a'n a bat hmangin India chesual tur a chhanhim a, ball vawm thiam chet a hun - England opener Jason Roy chu Bhuvneshwar Kumar chuan a ball hmasa ber hmangin a hnawtchhuak nghal!
Captain Buttler pawh run li chiah a siam tihin kum 32 mi Bhuvneshwar hian pavillion lamah a thawn kir leh a, Meerut tlangval hmaah English batsman te an che hleithei lo a ni ber.
England tan Moeen Ali (35) leh David Willey (33) ten beiseina rawn siam ve leh mah se India-in Kumar chauh ni loin bowler ṭha Yuzvendra Chahal (2 wickets) leh Jasprit Bumrah (2) te an la nei a, over 17-ah England-in run 120 chiah an siam hman tihin an vawm out vek a, chiang takin India an chak.