Pulev barakhaihtu Chisora a chak

British boxer rothap Derek Chisora chuan match thum zet a zawna a tlawm hnuin hnehna a chang ve leh ta a, Kubrat Pulev chu split decision hmangin a hneh a, WBA international heavyweight title a hlawh chhuak.

O2 Arena-a boxer pahnih inhnekah hian judge pakhat chuan 116-112 in Pulev a chaktir a, mahse, endiktu dang pahnihin 116-112 leh 116-114 a Chisora an chaktir avangin kum 38 mi boxer Chisora hi a tawpah ban phar sang zawk a ni.

Chisora chuan, "A awlsam lo a, engtiklai mahin fight awlsam ka thlang ngai lo, fight hautak hmachhawn hi nuam ka ti a ni," a ti a, kawng awlsam a thlan ngai loh thu a sawi.

Zimbabwe-a piang Chisora hian May 2016 khan Pulev hi split decision hmang thoin a lo ngam lo tawh a, kum 2022 a herchhuah meuh chuan mipui rin hlawh lo zawk chungin phuba a la ta. Kum 41 mi Pulev tan vawi 32 fight a hmachhawna vawi thum a tlawmna a ni a, vawi 29 a chak tawh thung.

Chisora hian October 2020-a Oleksandr Usyk a ngam loh hnuah Joesph Parker chu vawi hnih a ngam lo leh a, hei vang hian rin a hlawh lo - mahse, Chisora-a'n a thiam a lo la theihnghilh lo a, heavyweight boxer ṭha Pulev a hneh.

Pulev a hneh avangin Chisora hian fight vawi 45 a hmachhawnah vawi 33 hnehna a chang ta a, vawi 12 a tlawm tawh thung - a fight leh tur atan vawi hnih a lo ngam loh tawh Dillian Whyte leh Deontay Wilder hming lam rik a ni mek.

Chisora promoter Eddie Hearn chuan, "Hun a nei tam tawh lo a, mahse, aman nuam a tih lai leh ring chhunga awm nuam a tih lai hian a tan hma kan la zel ang. Middle East lama kal a duh a, a ṭha ber zel a duh - a tan fight ṭha tak neih tur a awm theiin ka hria," a ti a, Chisora a la chawl mai dawn lo.