Raphinha a zin ve lo

Premier League season thar inbuatsaih nan Leeds United chu Australia-ah an zin a, an zin chhuahnaah hian Brazilian winger Raphinha a tel ve lo. Leeds hi tun nipui bazar chhunga chhuahsan ngei a tum.

Raphinha hian kumtir lam khan Barcelona chu inremna a neihpui tawh, mahse Catalan club hian Leeds beisei ang zat pawisa an theh chhuak phal lo. Arsenal an lo lang a, an dilna chu hnawlsak an ni.

Chelsea hming a lang leh, anni hian Leeds beisei zat pawisa an phal. Mahse, Raphinha-a'n a club zawm duh ber chu Barcelona a ni thung a, inremna an la nei thei lo, a zawm ber tur chiang loin a awm mek.

Leeds United manager Jesse Marsch chuan, "Raphinha hian duhthusam a nei a, chumi chu a thleng dik thei dawn em, tih chu hunin a la hril ang. Kan hnena awm hi a hreh lo tih pawh ka hria," tiin a sawi.

Nimin khan Leeds hian Gold Coast an pan. Season thar inbuatsaih nan hian Aston Villa leh Brisbane Roar te an hmachhawn dawn, chumi hnuah Perth lamah Crystal Palace nen an inkhel leh bawk ang.