Spurs defender thar Lenglet

Tottenham chuan squad an thuam chhah zel - Barcelona aṭangin Clement Lenglet an lalut. France international hian Spurs hi season khat chhung atan loan hmangin a zawm a, loan hun a hman zawh hunah an duh a nih chuan a nghetin an lei thei ang.

Kum 27 mi Lenglet hian season hmasa khan Catalan tan hmun pawimawh a chang phak meuh lo. La Liga match vawi sarihah chiah inkhel bul a ṭan phak, inkhelh tam a duh a nih chuan a khelh phakna tur hmun a pan mai chu a ngai.

Catalan club Barca hian 2018 khan Sevilla aṭangin Lenglet hi an lalut, pound maktaduai 35.9 man niin, amah lei chhuak duh tan pound maktaduai 265 hman a ngai ang, tiin contract an ziak. 2018-19 khan La Liga title a la a, 2021 khan Copa del Rey a chawipui bawk.

Tun nipui bazar chhungin Antonio Conte a che na hle. Spurs manager hian Lenglet hma hian Ivan Perisic, Fraser Forster, Yves Bissouma leh Richarlison te a lalut tawh bawk, player panga a lei khawm tawh a ni.