Wilshere-a'n inkhelh a chawlhsan

Arsenal midfielder hlui Jack Wilshere chuan inkhelh a chawlhsan thu a puang, kum 30 mi chauh la ni mah se hliam lah harsatna hrang hrangin a tlakbuak avangin kum naupangte ni chungin a chawlh a ngai.

Wilshere hian theihna a nei sang, kum 16 mi chauh a ni chungin Arsenal tan a khel phak - Gunners tan hian match 197 a khel a, a chawr chhuahna club tan hian FA Cup nomawi vawi hnih a chawi hman.

Hliamin a tlakbuak a, ngai a awh leh thei tawh lo. Arsenal a chhuahsan hnuah West Ham, Bolton leh Bournemouth tan a khel, a hun hnuhnung chu Danish club AGF Aarhus tan a hmang.

England tana match 34 kheltu Wilshere chuan, "Zinkawng ngaihnawm leh nuam tak chu a ni. Hun hlimawm leh lungchhiat thlak tak tak pawh ka tawng, rei tak ni lo mah se tawnhriat ka nei tam ve hman hle.

"Ka club hmangaih Arsenal tan captain armband ka hreng hman, kan ram England tan World Cup ka khel bawk. Footballer ni chunga ka thil chak pahnih a ni a, ka duhthusam ṭhin ramah khan ka leng," tiin a sawi.

Kum 2018 khan Wilshere hian Arsenal a chhuahsan, a chawrchhuahna club aṭanga a chhuah hnu hian a inkhel mumal tawh lo. Kumin February thla khan AGF a zawm, Gunners a chhuahsan nen a inkarah hian match 36 chiah a khel hial.

Hliamin a tihbuai em avangin a thlen san tur angin a thleng sak tawk lo tiin a sawi theih, 2020-21 season phei kha chuan club nei loin a awm hial. Wilshere chuan, "A chang chuan ka hun tawn ka chhui kir a, ka thunun theih loh thil thleng avangin ka vui lek lek ṭhin.

"Chutih rualin ka vui lo, kan nun hi duhthusam anga awm vek thei a ni bik lo. Hun rei lotê chhunga ka hlawhtlinna chan te avang khan ka lawm," tiin a sawi a, a chantawka lungawi dan a thiam.

Arsenal tana a inlan ṭan khan kum 16 leh ni 256 mi chauh a la ni. September, 2008 kha niin Blackburn Rovers an hmachhawn ṭumin bench aṭangin a tlan lut - North London club tana inlan thei naupang ber a ni hial.