Arsenal an chak ve ta

Mikel Arteta enkawl Arsenal chuan Covid-19 hnua a vawi khat nan hnehna an chang ve ta. Ningani zan Premier League inkhelah Gunners hian Southampton chu 2-0 in an hneh.

Table-ah pakuana dinhmun luah mek mah se Arteta chuan season tharah European football an khelh ngei a beisei. An hna hmasa atan erawh Pathianni tlai dar 5:30 hian FA Cup quarterfinal khel turin Sheffield United an lenchilh ang.

St. Mary's Stadium-a inkhelah Arsenal-in Granit Xhaka an chhawr thei leh tawh a, hlawh tam ber Mesut Ozil chu bench lamah dah chhunzawm niin hliam Bernd Leno aiah Emiliano Martinez-a'n si ban a nghak thung.

Tlarhma laia awm Eddie Nketiah-a'n Saints keeper Alex McCarthy ball pet chhuah tur nangchingin goal hmahruai a khung a, hun tawp dawnah substitute Joe Willock chuan goal hnihna a khung bawk.

Southampton Jack Stephens-a'n Pierre-Emerick Aubameyang a tih tluk vangin hnawhchhuah a ni a, freekick a chawi chu Alexandre Lacazette-a'n petin ball kal zel hi Willock-a'n a khung.

Premier League pahnihna nilai Manchester City chu hrem lai an ni a, hrem an nihna hi kaltlang pui a nih chuan EPL-a pangana tan Champions League a khelh theih dawn - Europa League khel tur pawh a nghawng ang.

European football chung-chang sawiin Arteta chuan, "Beiseina ka la nei reng, hun pawh kan la ngah tawkah ka ngai. Club ka zawm hnuah a vawi khat nan a zawnin kan tlawm, tunah chuan boruak ṭha lo hi a ṭhain a thlak chhunzawm ka beisei," a ti.

Season hmasa khan Arsenal hian UCL khelh beiseina sang tak an nei, league match hnuhnung parukah an elpui team hmachhawn tur an nei lo a, mahse team lian lo zawk thlir an tum chungin an zuih. Kuminah erawh thawnthu hlui chhiar nawn aiin a thara ziah danglam an tum ang.