Vawiinah team ṭha pariat a hriat dawn

LBS Suzuki All Mizoram Inter Village Football Tournament 2022-ah team 10 chiah an dam tawh a, vawiinah quarterfinal khel tur a hriat kim dawn. Team 204 aṭangin team paruk Champhai Kanan VC, Farkawn VC, Hnahthial Jt. VC, Lengpui VC leh Sialhawk VC bakah Republic Veng LC ten quarterfinal an lut tawh - Republic Veng chiah hi Aizawl team aṭanga quarterfinal lut thei an la ni rih.

Vawiin chawhma dar 11:00 hian Lammualah Armed Veng South leh Bungkawn te an inkhel dawn a, Aizawl veng pakhat chu an awm belh dawn. Inkhelh ngaihven tur zawk erawh chawhnu dar 1:00-a Ramhlun North leh Thenzawl West inkhel tur hi a ni thei ang.

AVS Vs Bungkawn
Tualchhung football ngainatuten Armed Veng Derby hmuh châkin an thlir ṭhup a, Bungkawnin tum dang lo neiin tualchhung football sulhnu nei ṭha Armed Veng an hneh. Tun inelnaa 'upset' lian ber zingah ngaih theih a ni hial.

Last 16-ah pawh Armed Veng South hi chak tur zawka ngaih an ni a, mah se thilmak hi a thleng nawn thei bawk. Bawngkawn hian player ṭha chhuan tur an nei meuh lo a, an keeper Lalawmpuia leh captain David Lalthlamuana te erawh Chhinga Veng leh Zo United lama khel tawh an ni thung.

Chutihrualin Armed Veng laka hattrick siam thei Rinthangsiama hi Armed Veng South tan en liam chi a ni lo. AVS erawhin C. Ramdinmawia, Lalnunsanga (Talea) leh Lalrammuanpuia (Apuia) te hmangin an nawr thei a, tualchhung football tawnhriat nei ṭha vek an ni. Tlarhnungah ISL defender Laldinliana Renthlei leh Lalhmangaihsanga (Papuia) te an awm a, an squad hi position tinah a ṭha rual hle.

Ramhlun N vs Thenzawl W
Tlai dar 1:00-a inkhel tur Ramhlun North leh Thenzawl West te hi first round-a inkhel tur chu ni se ngaihven an hlawh lo tawp ang. Mahse, tun ṭumah erawh tun dinhmun thleng tura an hneh thlir let hian ngaihven loh theih loh an ni.

Ramhlun North hian Ramhlun Derby-ah Ramhlun Venglai 4-1 in an hneh a, Falkawn 4-2 in an hneh leh bawk. Inkhel hmasa pahnih hi inchhuanna tur a ni lo a, mah se match hnuhnung berah champion rinkai Bawngkawn 1-0 in an hneh. Mizoram Police goalkeeper Lalṭanpuia, sulhnu nei ṭha V. Lalchhuanawma leh India junior team tan pawha khel tawh Lalpekhlua Jongte te an ni nawk.

Thenzawl West lamin hming hmerha chhuan tur an nei lo. Mahse an team hneh tawhte chu Durtlang, College Veng, Saron Veng leh Tuithiang te an ni. An team hneh hi team ṭha tak vek an ni a, Durtlang hi champion rinkai an ni pha, College Veng leh Tuithiang pawhin player ṭha an kawl hnem bawk.

Vawiin inkhel turah pawh Thenzawl West hi a buk rit tur zawk an ni a, Ramhlun North-in 'Dark Horse' tia sawi theih Thenzawl West hi hneh an tum thung ang.

LBS Suzuki All Mizoram Inter Village Football Tournament 2022

ROUND OF 16
July 9, Inrinni
AR Lammual
Seling VC 1 - 1 Lengpui VC
Penalty Shootout-ah Lengpui 3-2 in an chak
SEL : F.Lalhmangaihzuala 41'
LEN : Lalremsanga 2'

Republic Veng LC 1 - 1 Lungdai VC
Penalty Shootout-ah Republic Veng 4-3 in an chak
REP : Lalhriatpuia 4'
LUN : Lalbiakmuana 2'

Vaivakawn LC 0 - 0 Champhai Kanan VC
Penalty Shootout-ah Champhai Kanan 5-4 in an chak

RG Stadium
Salem Veng LC 1 - 1 Farkawn VC
Penalty Shootout-ah Farkawn 4-3 in an chak
SAL : Vanlalngheta 90+6'
FAR : Ramnunpuia 6'

Mamit Jt VC 0 - 3 Sialhawk VC
SIA : R. Laldanmawia 30'; Rotluangliana 32'; Vanlalduata 90+2'

Khawzawl Vengthar VC 1 - 2 Hnahthial Jt. VC
KHA : David Lalsangpuia 22'
HNA : Lalrintluanga 80'; K. Lalrinfela 85'

Vawiin Inkhel Tur
AR Lammual
Armed Veng South LC 11:00 AM Bungkawn LC
Ramhlun North LC 1:00 PM Thenzawl West VC

QuarterFinal
July 12, Thawhlehni
AR Lammual
Hnahthial Jt. VC 12:30 PM Lengpui VC
Republic Veng LC 03:30 PM Champhai Kanan VC

July 13, Nilaini
Farkawn VC 12:30 PM Sialhawk VC
Armed Veng South/Bungkawn 03:30 PM Ramhlun North/Thenzawl West