Farkawnin Salem Veng an barakhaih

Inrinni khan RG Stadium-ah Farkawn leh Salem Veng an inkhel a, All Mizoram Inter Village Football Tournament 2022 last 16 a nih tawh bawk avangin inkhel entu pawh an ṭhahnem. Champion rinkai zinga tel pha Salem Vengin an khawtualah Farkawn an mikhual a, chak tura ngaih ni mah se hun pangngaiah a suttu zawk niin 1-1 in inkhel a tawp. Penalty shootout-ah Farkawn 4-3 in an vannei ta zawk.

Inkhel an ṭan chauh a, minute rukna lekah Farkawnin counter attack hmangin mawi takin an nawr let. Farkawn hian chiang taka Salem Veng tlarhnung ṭhiatin Ramnunpuia'n ṭha zetin a pet goal a, goal sawisel bo a ni.

Salem Vengin ṭantu an ngah a, inkhel an thunun a, goal chance an nei a, goal erawh an khung thei bik lo. Farkawn lamin counter attack hmangin an tibuai ve zel bawk. Minute 90 chhungin Salemin an sut thei lo a, injury time minute 10 pek belh niin minute ruknaah Joseph Lalnunpuia'n mual veilamah step over-in, a cross ball chu Vanlalngheta'n a tauh lut.

Goal dang a luh belh tawh lo. Penalty shootout hmangin chak zawk zawn a ni a, Farkawnin 4-3 in hnehna an chang. Inkhelh banah Salem Vengin an lungawi loh thu an au chhuahpui a, Farkawn an lawm bik lo.

Team pahnih hi referee chungah an lungawi lo ve ve. Farkawn lamin hun pek belh rei lutuk leh player hrem dan chu an hrethiam lo a, Salem Vengin hun pangngaia penalty an hmuh lo leh goal thei tura ngaih box pawna khawihtu Farkawn keeper Lalrinmawia hnawhchhuah a ni lo chu an hrethiam lo bawk.

Farkawn GSA secretary Lalengzauva Chenhrang chuan, "Kan vanneih ni ni sela chuan kha aia tam thun thei kan ni a. Chutihrualin minute 90 chhung khati khawpa min nawr chunga kan inveng thei kha kan vannei. Inelna a sang tawh si a, kan referee te han ṭang lehzual se ka duh hle," tiin Vanglaini a hrilh.

Salem Veng coach Lalrindika Hmar chuan, "Inkhel kan thunun a, goal chance pawh kan ngah a, kan vannei ta lo. Football-ah chuan hetiang hun hi a thleng ṭhin a, a thlen chiah hi chuan a na ngawih ngawih a ni," tiin Vanglaini a hrilh bawk.