Lengpui chakna penalty

All Mizoram Inter Village Football-a team ṭha ber zinga mi leh sulhnu nei ṭha Lengpuiin Inrinni khan Lammualah Seling an hmachhawn a, awlsam taka chak tura ngaih ni mah se penalty hmangin an chak ṭawk.

Lammual inkhelah hian minute hnihna lekah Lengpui tan F. Lalremsanga'n a khung nghal a, goal dang an khung belh hun tur an thlir ṭhup laiin an khung belh thei tawh lo. Minute 41-naah Selingin mawi zetin Lengpui tlarhnung an ṭhiat a, F. Lalhmangaihzuala'n keeper chauh a hmachhawn hnuah 'cool' takin goal-ah a chantir.

Lengpuiin Lalrokima, Remsanga leh Joe Zoherliana te hmangin nawr na mah se goal hmuh tur a awm lo - Seling an ṭang khawng tlat. Hun tawp dawn hnaiah ball umtu Lalremsanga leh keeper R. Vanlruatdika te an insu a, Seling keeper hi thlak a ngai. Remsanga'n keeper tih nat tum loa ball a tum miau avangin hnawhchhuah a ni lo. Seling ṭantute erawhin an hrethiam lo.

Injury time-ah Seling second keeper Joseph-a chu Lengpui player Joe Zohera'n ball pet a tumna lamah a pet fuh. Seling-in red card beisei leh mah se referee erawhin 50-50 ball inchuh an nih miau avangin card a phawrh lo a, foul a ham thung.

Hun pangngaiah team pahnih 1-1 in an inhnehtawk a, penalty shootout-ah Lengpui an vannei a, anmahni ṭantute awmna lamah penalty an pet. Lengpui tan keeper R. Vanlalhmangaiha a (Lalhmaa) che ṭha a, Chhinga Veng FC tan pawha lo khel tawh Lalhmaa hian a hmasa pahnih a dan bakah Seling tana a tawp bera pettuin crossbar a pet ber bawk avangin 4-3 in hnehna an chang.