Champhai Kanan lakah ‘Giant Killer’ an tlawm

All Mizoram Inter Village Football-a team langsar hneh hnem ber chu Vaivakawn an ni a, coach tawnhriat nei ṭha Lalruatliana Sailo (Tawia) hote hian Aizawl team ṭha Electric Veng, Chhinga Veng leh Bethlehem Vengthlang an hneh tawh. Inrinniah erawh Vaivakawn an vannei zo ta lo a, Champhai Kanan nen hun pangngaiah 0-0 a an inhnehtawk hnuin penalty shootout-ah 5-4 in an tlawm.

Vaivakawn chak chhoh dan hi 'vannei' tia sawi theih a ni a, an inkhel uluk taka chik erawh chuan vannei ni loin coach ṭha hnuaia khel an nihzia a lang thung. Champhai Kanan lakah pawh coach Tawia'n an theihna a hrechiang a, game mawi khelh a tum lo a, goal venhim a tum.

Tawia hian ISL club Hyderabad keeper Lalbiak-hlua Jongte an kawl tih a hria a, mualchhungah pawh India international Lalengmawia Ralte (Apuia) thlawp tur a ngah tawk lo tih a hria. Vaivakawn hian awmze nei takin goal venhim hna an thawk a, an tum an hlawhtling - minute 90 chhungin goal an chhuah lo.

Chutihrualin Champhai Kanan hmuhnawmzia erawh sawi lan ngei a ṭul thung. Vaivakawnin tlarhnungah bus an park a, Kanan lamin passing game nalh leh attacking game hmuhnawm an lantir thung.

Tlarhnungah veteran defender Lalchhawnkima a khawng ṭha em em a, midfield-ah MFA Cup-a FC Vengthlang champion puitu leh best midfielder ni bawk Lalramsanga chu hmuhnawm a tling a, mual sira R. Ramdinthara che vel pawhin inkhel entu mit a titlai pha.

A tawpah erawh penalty hmangin chak zawk zawn a ngai a, Champhai Kananin penalty pet goal lo hmasa mah se a vannei zawkah an ṭang. Kanan hian penalty hmanga ṭum hnih chak tawh Vaivakawn chu 5-4 in an hneh.