Football hmuhnawm kheltu Hnahthial

Hnahthial Jt. VC-in Inrinni khan RG Stadium-ah football hmuhnawm an lantir a, chutihrualin chak turin vanneihna an mamawh thung. Hnahthial hian Khawzawl Vengthar lakah si an phur hnuah 2-1 in hun tawp dawnah an lehthal a, quarterfinal-ah Lengpui nen an inhmachhawn ang.

Team ṭha pahnih inkhelah Khawzawl Veng-tharin goal an khung hmasa a, David Lalsangpuia'n ṭha zetin minute 22-naah a khung. Hemi hnu hi chuan Hnahthial Jt. VC-in inkhel an thunun lehzual a, midfielder ṭha pahnih K. Lalrinfela leh Joseph Vanlalhruaia te hmangin game hmuhnawm an pho chhuak.

Amaherawhchu Khawzawl tlarhnungah Aizawl FC defender Lalṭhakima te an awm a, awmze neia goal an venhim tlat avangin Hnahthialin an su tlang thei lo. Minute 15 vel chauh a awm tihin Hnahthialin penalty an hmu a, Lalrintluanga'n (Tutua) a hlah.

Hemi hnu hian ruah a sur nasat avangin an inkhel zui thei lo a, Hnahthial tan malsawm ruah a tih theih. Hnahthialin an khelh dan thlakin striker pahnih an rawn hmang a, penalty hlahtu Tutua'n a tihsual siam ṭhat nan minute 80-naah siphurh a sut a, Mafela'n minute 85-naah chakna goal a khung.

Hnahthial DFA secetary leh tun ṭuma assistant coach C. Lalramdinsanga (RD-a) chuan, "Inkhel kan thunun a ni thei a, amaherawhchu kan vannei a, kan chak a ni. Khawzawl Vengthar chak loh dan kha a hrehawm ang a, kan tawrhpui. Chutihrualin Khawzawl ṭantuten 'Champion ru, Champion ru' tiin min thlah a, a ropui ka ti hle. Khawzawlin duhsak takin Rs. 1000 min hlan bawk a, an chungah kan lawm hle a ni," tiin Vanglaini a hrilh.