Lungdai lakah Republic Veng an vannei

Republic Veng leh Lungdai te hun pangngaiah 1-1 in an inhnehtawk a, penalty shootout-ah Republic Veng 4-3 in an chak. Inrinni chhuna Lammual inkhelah hian goal a lut hma hle, minute li chhung lekin goal hnih lut hman mah se goal dang hmuh tur a awm zui lo.

Lungdaiin minute hnih lekah halfway line aṭangin freekick an vawrhlut pawp a, Lalbiakmuana'n a tauh goal. Republic Veng tlarhnung an mutthlu a, goal khungtu hi MPL Under 18 top scorer Lalbiakmuana a ni tih hriat a ṭha bawk.

Minute hnih hnuah Republic Vengin siphurh an sut nghal. Goal luh theih nan hian Mizoram Police striker F. Lalrinpuia, Atletico Madrid-a inzir C. Lalhriatpuia leh MPL-a FC Bethlehem kaipuitu zinga mi Lalnunzira te an inrawlh vek a, Mizoram striker C. Lalhriatpuia'n a hmawr a bawk.

Republic Vengin inkhel an thunun chhunzawm a, game mawi khel chhunzawmin passing game lantir mah se goal a keng tel lo. Lungdai keeper C. Lalremmawia ṭhatzia hmuh a ni thung. Hun tawp hma hretin Lungdaiin freekick hmang bawkin Republic Veng an rum ṭhaih a, goal-ah lut mah se assistant referee-in offside flag a phar a, pawmsak an ni lo. Penalty shootout-ah Republic Veng an vannei zui a, 4-3 in an chak.