Spurs an tawlhthlu; Blues tan lawmna!

Tottenham Hotspur-in Premier League nomawi an beiseina kawngah daltu an tawng a, Zirtawpni zan khan London Derby-ah West Ham chu 1-0 in an ngam lo.

Zanin dar 12:30-a Middles­brough mikhual tur Chelsea tan an hnuai chiaha awm Spurs chak loh hi lawmna thlentu a ni - Antonio Conte a naute hian an hmabak match liah vawi hnih hnehna an chang thei a nih chuan Premier League nomawi an chawi tawh ang.

A pawi
Tottenham-in an ṭhenawm club lakah hnehna an chang a nih chuan Thawhṭanni zana Boro hmachhawn tur Chelsea tan pressure an siam thei dawn tih an hria a, Hammers laka chak hi nomawi an beiseina kawngah a pawimawh takzet.

Mahse, a zawna league match 10 chhung chak hmel hmuh tum Spurs beisei ang ngawtin thil a kaltluang lo. Inkhel ṭantir lamah Hammers keeper Adrian chuan Harry Kane-a hun ṭha neih chu a lo dan sak a, a hnu lawka Eric Dier ball tauh chu ṭha zetin a lo dang bawk.

Beisei phak lo
Spurs-in first half-a an vawi hnih hun ṭha neih bak an neih chhunzawm tawh lo a, chawlhlawk hman a nih hnuah pawh a danglam chuang lo. Minute 65-naah Manuel Lanzini chuan chak phu zawk Hammers tan a khung a, Spurs player-te an hawihai hle.

Tun season-a club pahnih intawn hmasakin White Hart Lane-ah minute 89 thlengin Spurs hi 2-1 in chak lo mah se hun a tawp meuh chuan 3-2 a ni. Mahse, London Stadium-ah erawh Spurs khelh dan aṭangin thawnthu hlui kha ziah nawnin a awm dawn lo tih a lang chiang a, an league match hnuhnung 34-a goal 71 khung thei Spurs-in eng ruai an ang lo.

Bilic-a him?
Hammers manager Slaven Bilic-a'n season hmasaah beisei phak bakin London club a kaihruai a, pasarihna nichungin season an khar. Tun season-ah erawh player pawimawh Dimitri Payet vanga buaina nen beisei an phak lo a, Croatian manager hi ban tur anga sawi thawm a ri ring hman hle.

Mahse, Inrinni zana an chak avangin Hammers-in point 40 an hmu a, Premier League-ah an himah a ngaih theih. Club captain Mark Noble chuan an manager chuan player-te thlawpna a neih tlat thu a sawi a, Bilic erawhin, "Ka hmalam hun ka ngaihtuah lo. Ka naute hetianga ṭhaa an khelh chhung chuan ka hlim," tiin a sawi thung.

Beisei a bo lo
Tottenham manager Mau­ricio Pochettino chuan, "Hei aia result ṭha zawk hi kan phu a ni. Bul kan ṭan ṭha a, first half-ah inkhel thunun mah ila goal kan khung thei lo. Second half-ah erawh beisei kan phak lo a, nomawi kan beisei a nih chuan kan goal chhuah ang kha chu chhuah chi a ni lo," a ti.

Argentine manager chuan nomawi chawi an la tum thu sawi nghalin, "Kan bei zel ang. Dawhthei taka kan nghah a ngai a, a hmai ai kha chuan harsat thuah chuan a harsa tawh zawk dawn a ni," a ti a, beidawng erawh a tum lo.