Man City-in goal 5 an khung

Champions League khelh tum Manchester City chuan Crystal Palace 5-0 in an sawp. Pep Guardiola naute hian point 69 hmuin season thara an Champions League beiseina an chhi nung ve zel.

Inrinni zan inkhelah City tan David Silva chuan tun season-a an goal rang ber ni turin minute hnihna lekah goal hmahruai a khung, Vincent Kompany, Kevin de Bruyne, Raheem Sterling leh Nicolas Otamendi ten a khat mawi tawkin an khung belh bawk a ni.

Etihad Stadium-ah City hian nikum September thla khan Bournemouth 4-0 in an hneh tawh a, he mi hnuah tum ṭum hi an mikhual an sawp nasat leh ber ṭum a ni.

Manchester City manager Guardiola chuan, "Team dang pawhin Champions League khelh an tum a, tunah chuan kan khelh leh khelh loh tur chu kan kutah a awm tawh e," a ti. City hian Leicester City, West Brom leh Watford an la hmachhawn leh ang.

Crystal Palace boss Sam Allar­dyce chuan, "Ka nauten kan zir danin an khel chhuak lo, a bikin tlarhnung a phui lo takzet. Ball pet chhuah mai tur nia lang an pet chhuah loh vangin goal kan chhuah a ni. Karleha Hull City nen kan inkhel tur hi tun season-a inkhel pawimawh leh boruak lian ber tur a ni ang," a ti.

Palace hian match 36 khelh aṭangin point 38 an hmu a, league table-ah 17-na an ni. May 14 zana an hmachhawn tur Hull hi 18-na an ni thung, a chak lo zawk tan season thara English league sang ber khelh zui zel beiseina a tlem tawh dawn avangin Allardyce sawi ang khian a pawimawh dawn hle a ni.

Premier League inkhel dangah tla chiang tawh Sunderland chuan Hull City 2-0 in an hneh a, Hull hi relegation zone-ah an tla hniam ve leh rih. Swansea City chuan Fernando Llorente goal hmanga Everton 1-0 a hnehin EPL khelh chhunzawmna an beisei zel - Swans hian point 35 hmuin table-ah a himchin chiahah an awm.