Mission Vengin Tuikual South an sawp

Mizoram Super League inkhel zinga mipui ngaihven hlawh ber pakhat chu Zirtawpni zan khan Hawla Indoor Stadium Republic Vengthlangah khelh a ni a, Mission Veng Vikings chuan Tuikual South 89-59 in an sawp.

MSL2 semifinal-ah khan Tuikual South hneh loin Vikings zinkawng a tawp. Kuminah erawh thil a danglam tawh, Vikings hian league round-ah TKS hi 86-75 in an hneh a, semifinal Game 1-ah point 30 zetin an hneh leh ta. Season hmasa lama an mahni 'Bye Bye' tu team kha hnawtchhuak let turin an dinhmun an siamrem - May 10, Nilaini zan khian R. Dengṭhuama Stadium-ah Game 2 khelh a ni ang.

Thawhlehna

Mission Veng Vikings manager H. Lalhruaitluanga chuan, "Season tir lam­ah kan chefuh tawk lo a, kan insiamṭhat hnuah erawh kan nauten pressure nei loin inrintawkna hnuaiah an khel thei," tiin Vanglaini a hrilh.

League match hmasa lama beisei phak lo team hian Ronald March an neih chinah dan theih loh ang mai an ni. American player March hian Tuikual South an hneh hmasak ṭumin point 44 zet a score a, tun ṭumah pawh ani hian double double nei lehin inkhel result danglamna thlentu a ni. Vikings tan hian Lalrina Renthlei chuan point 25 score-in tualchhung player hmuhnawm berte zinga mi a nih zia a lantir leh bawk.

Semifinal Game 1-ah American player March hian point 40 zet a score a, rebound vawi 11 a la bawk. A point score zinga 16 chu second quarter bika mi a ni. Quarter hnihna bikah March-a point score (19 points) hi TKS lam player MS Dawngzela Chenkual (2 points), K. Vanlalruata (8), Zorinpuia Hrahsel (2), Lalremruata Ralte (2) leh Lalfakmawi (2) te point score zat nen a intluk!

Ahruaia chuan an danglam tak chhan sawi zuiin, "Ronald March theihna hi a sang em em a, ani an rawn lan hnu hian kan player dangte pawhin inrintawkna an neih belh bakah phurna a siamsak. A pawimawh ber pakhatah chuan coach Reuben Lalchhandama thawhrim vang a ni," a ti. Vikings mana­ger Ahruaia hian inkhel a la tawp loh thu leh veng mipui ṭawiawmna an hmuh avanga an lawm thu a sawi tel bawk.

Game khat-na chauh

Hnehna chang zo lo mah se Tuikual South coach KC Lalliantluanga a zam lo, "Keini chuan kan khelh hmabak hi kan ngaihtuah lawk ṭeuh ngai lo, a indawt te te in kan hmachhawn ṭhin. Tunah pawh hian kan chak lo palh a ni mai a, kan inkhelh leh tur Game 2-ah chiah kan rilru kan dah leh tawh a ni," tiin beisei an la neih thu Vanglaini a hrilh.

TKS hian state pawn player Palpreet Singh Brar leh Amjyot Singh ten an chhawr thei lo a, Congo aṭanga India rama lehkha zir tura rawn kal Nicolas Daniel-a'n Vikings lakah point riat a score bakah rebound vawi li a la a, danglamna thlen tur khawpin a ṭha tawk lo.

Phengphehlep tan tualchhung player an pawimawh zanah F. Zodinthara chuan point 16 a score bakah rebound vawi riat lain a thawh hlawk ber a, TKS player dang zingah an captain thlawp thei an awm lo. Tuikual player 11 zetin point score mah se Dina tih lohah chuan K. Vanlalruata (10points) chiah point 10 score tling thei a awm.

A naute khelh dan chungchangah KC-a chuan, "Zan dang nen a inang lo, ball kan chang tlem a ni hran lo a, eng nge min mawlh pawh ka hrethiam chiah lo basket kha kan nei hleithei thlawt lo a ni. Game 2-ah chuan league round lama kan khelh ang khan pressure nei loin nuam ti taka kan khelh chuan hnehna kan la chang let thei ang," tiin a sawi.