I League leh ISL la inzawm dawn lo

All India Footbal Federation chuan May 6, Inrinni khan I League leh Indian Super League chu tun hnai maia thlun zawm an la tum loh tih thuchhuah an siam a, Mizo club Aizawl FC champion-na league hi kum thum chhung vel chu India rama club football inelna sang ber a ni chhunzawm dawn a ni.

AIFF president Praful Patel chuan Kolkata club lian Mohun Bagan leh Kingfisher East Bengal aiawhte chu Mumbai-ah hmuin India ram football hmalam hun atan thutlukna nghet siam a la nih loh thu a lo hrilh.

AIFF lam chuan, "I League hi inelna sang ber a ni chhunzawm ang a, Chutih rualin Indian Super League pawh thla sarih atan pawhsei a ni ang a, kar tawpah zel khelh a ni ang. League pahnih hi thlun zawm a ni lo ang a, kum hnih thum hnuah thutlukna siam a ni ang," tiin thuchhuah an siam.

AIFF president Praful Patel chuan vawiin hian Bahrain-a neih tur AFC Congress-ah India ram aṭanga Asian Football Confederations hnuaia inelnaa tel tur club chungchang chu sawiho turin a chhawp chhuak dawn.

AFC Congress-a thu sawi ho tur zingah hian AIFF aṭanga rawtna I League leh ISL-a a sang pahnih ve ve emaw playoff khelhtir a, chumi hnua champion-in Asian Champions League khelh tir, tih a tel a; hei bakah hian AFC-a India quota neih mek pahnih hi pathum tihsan an dil tel dawn niin Vanglani chuan thu a dawng.

AIFF rawtna hi a tlang a nih chuan ISL-in Asia khawmualpui hnuaia inelna an hmachhawn dawn tihna a ni a, I League hlutna ber pakhat AFC-a khelh theihna tih chu an nei tel tawh dawn a nih hmel.

League pahnih hi thla sarih ve ve khelh a nih a, player inpawh tawn theih loh a nih phei chuan player ṭhain pawisa tam zawk ISL an pan rinawm a, I League tan thu lawmawm a ni lo ang. Inrinniah inbiakna a tel ve East Bengal aiawhte chuan he thu hi ngaihtuah nawn an duh thu media lam an hrilh tawh.

FIFA president Gianni Infan­tino chuan Aizawl FC chu I League an champion avangin lawmpuina thu AIFF President kal tlangin a thawn a, FIFA hian Bengaluru FC pawh an cham­pion khan lawmpuina thu an lo thawn tawh bawk a; ram hrang hrang League champion hi FIFA hian lawmpuina thawn thinin Mizo club ngei pawhin I League champion nih vangin FIFA president atangin Praful Patel kal tlangin lawmpuina thu an dawng a ni.

I League champion AFC chuan AIFF chu top league an khelh loh chuan kawng hrang hranga lungawi lohna lantir an tum thu AIFF President hnenah an thawn a, he mi chungchangah hian Praful Patel chuan, "Aizawl FC hi vui tur an ni lo. AIFF vang chauhin an relegate hnua I League khel leh thei an ni. Lungawi lohna an lantir a nih pawhin a tawp berah an lantir tur a ni. Invauna hian awmzia a nei lo. India ram football kal zel dan turah thu chiang a la awm hauh hmaa thuthar thehdartute hmaa an lungawi loh thu an sawi chiam hi a dik lo a ni," tiin Mizo club chungchang a sawi.

AIFF hotu ber chuan Aizawl FC lehkha thawn a la hmuh loh thu a sawi a, Inrinnia in­hmuh­khawmnaah Mizo club chungchang hi an la ngaihtuah loh thu a sawi tel bawk.

AIFF chuan an commercial partner IMG-Reliance lamin sum tam tham tak hmanga an din ISL chu AFC hnuaia an khelh theih dan zawnpui an la tum zel a, a inelna ziding zawk I League lamin AFC-a khelh theihna an neih chhuhsak si loa inrem dan an zawng mek a ni.