Barca leh Real-in goal an surtir
Spanish La Liga nomawi inchuh boruak a sang zel a, a chung lam pahnih Barcelona leh Real Madrid-in tawlhthluk an tum lo - Inrinni zan khan Barcelona hian 4-1 in an mikhual Villarreal an sawp a, Barca an chak tih hre saa inkhel Real Madrid-in a tlawm bik nih duh loin Granada chu khualmualah 4-0 in an sawp ve bawk.
Barcelona tan Lionel Messi bawk a langsar a, Argentine forward hian goal hnih khungin tun season-ah inelna hrang hrangah goal 51 a khung tawh - Europe a league sang panga (Spain, England, Italy, Germany, France) a players zingah tun season-a Messi goal khung zat khung thei an la awm rih lo.
Goal khung thiam
Inkhel ṭan aṭanga minute 21-na lekah Barca-in Neymar hmangin goal hmahruai an khung a, Villarreal-in rin loh takin minute 11 hnu lawkah an si phurh an sut - Cedric Bakambu chuan Barca offside trap siam bumin mikhual team tan hian a khung a, mahse Catalan club chhaih kawlhna goal mai a ni.
Minute 45-naah Messi-a'n an hmahruaina goal a khung a, Luis Suarez chuan Messi hnen aṭanga a ball hmuh chu minute 69-naah player pahnih bumin ṭha zetin a khung leh bawk. Barca-in an la duhtawk mai lo, Jaume Costa handball zar zoin penalty an hmu a, Messi-a'n harsatna nei loin a 'chip' goal.
Barca tan MSN
Nou Camp-a inkhelah Barcelona tan MSN tia hminglem an pek Messi, Neymar leh Luis Suarez-ten goal an khung vek a, season thum chhung chu player pathum goal khung zat belhkhawm hian goal 100 a tling ziah tihna a ni! Tun season-a goal 100 an khung theih nan Messi-a'n goal 51 a thawh a, Neymar-a'n goal 16 khungin Suarez-a'n goal 35 a khung tawh thung.
Kum 2014 khan Suarez-a'n Liverpool aṭangin Barca a pan a, MSN season hmasa ber a ni. Player pathum hian an season hman ho hmasak berah goal 122 ngawt khungin treble champion an ni. Season hmasaah goal 131 khungin La Liga, Copa del Rey, Club World Cup leh UEFA Super Cup an chawi a, tun season-ah goal 100 khung leh tawhin Spanish Cup leh league an la beisei mek.
Ronaldo tel loin
Real Madrid boss Zinedine Zidane-a'n Atletico Madrid 3-0 a an hneh ṭuma inkhel chau a player-te a chawlh hahdamtir a, an thiampuipa Cristiano Ronaldo chu squad-ah pawh dah ni lo mah se harsatna erawh an tawh phah lo. Minute thumna lekah James Rodriguez chuan Real tan goal hmahruai a khung a, minute 11-naah a chhunzawm leh bawk - Real tan a match hnuhnung pakuaah goal sarih ngawt a khung ta.
Minute 30-na a ni a, Alvaro Morata inlar hun a ni. Spanish striker hian hun ṭha pek a nih phawt chuan goal khungah harsatna a nei lo tih pholangin an goal thumna a khung a, minute nga hnu lawkah a belhchhah leh bawk - tun season-ah inelna hrang hrangah goal 20 a khung tling tawh. Real hi goal tam zawk khung thei la ni cheu mah se Lucas Vazquez chuan a hun ṭha neih bar pet per nan a hmang a, Casemiro chuan goal ruakah a khung lo bawk!
Atletico an chak
Madrid Derby-a mualpho hlim Atletico Madrid-in season thara Champions League khel turin an dinhmun an sawhnghet ve zel a, Inrinni zana captain Diego Godin hnawhchhuah a nihna inkhelah Eibar chu 1-0 in an hneh. Atletico goal awmchhun hi Saul Niguez-a'n a khung a ni.
Atletico Madrid boss Diego Simeone chuan, "Season bul kan ṭan dan a duhawm lo em em a, mah se hnual loa huaisen taka kan beih avangin tun dinhmun hi kan thleng a ni. Champions League lamah pawh result duhawm lo tak kan nei a ni mai thei a, mahse kan tan chuan theih loh hi a awm lo," tiin Champions League semifinal second leg a thlirlawk.