Monaco tan nomawi a hnai

AS Monaco tan Ligue 1 nomawi chu ban phakah a awm ta. Monaco hian Nancy 3-0 in an hneh a, inkhelh hmabak pathum an la neihah vawi khat hnehna an chang leh thei a nih chuan kum 2000 hnua a vawi khat nan league champion an ni ang.

Inrinni zan inkhekah Nancy defender Tobias Badila chuan minute thumna lekah an lama a tih luh bakah Monaco tan hian Bernardo Silva leh Thomas Lemar ten goal khat ve ve an khung bawk. Monaco hian tun season legaue match 35 an khelh aṭangin goal 98 zet an khung tawh a ni.

Inkhel dangah champion lai Paris St-Germain chuan Edinson Cavani goal hnih hmangin Bastia chu 5-0 in an sawp. Uruguay international striker hian tun season-ah league goal 33 a khung tawh, ani bakah hian Lucas Moura, Marco Verratti leh Marquinhos ten an khung ve bawk.

PSG hian point 83 hmuin hmahruaitu Monaco chu point thumin an phak lo mek a, match khatin an khel tam zawk. Unai Emery naute hian goal difference-ah Monaco hi goal 18 zetin an phak lo bawk a ni.