Torino-in Juventus an chelh

Injury time-a Gonzalo Higuain goal khung hmangin Juventus chuan an mikhual Torino lakah point khat an hlawh chhuak hram.

Massimiliano Allegri nau­ten tun season Serie A match Juventus Stadium-ah vawi 17 khel tawhin hnehna an chang vek. Inrinni zanah erawh league table laihawl team Torino tan Adem Ljajic chuan free kick aṭangin minute 52-naah goal hmahruai khungin Juve a barakhaih.

Goal an khung aṭanga minute nga hnuah Torino midfielder Afriyie Acquah chu yellow card vawi hnih hmuh vangin hnawhchhuah a ni. Player tam zawka khel Turin club hian minute 90-na thlenghin an siphurh an sut thei lo.

Minute 91-naah Argentine striker Higuain chuan goal khungin an khelmuala tlawm hmel an hmuh lohna record duhawm chu a chhawm nung hram a ni.

Juve hian league match 35 an khelh aṭangin point 85 an hmu tawh a, a zawna season ruk nan Italian champion an ni teuh tawh hle. Pahnihna Napoli chuan khelh zat inangah point 77 an hmu a, pathumna AS Roma chuan match khata khel tlem zawkin point 75 an hmu thung.