R. Dengthuama Indoor Stadium-ah Zarkawt BCA vs Khatla TBL

Zarkawt BCA tan Mizoram Super League season thumna final khel turin Khatla TBL lakah chetsual a thiang tawh lo a, TBL tan a zawna final vawi thum khel turin vawi khat hnehna chan a tawk. Zanin dar 8:00 hian MSL3 semifinal Game 2 khelh a ni dawn; R. Dengṭhuama Indoor Stadium, Mualpuiah tualchhung basketball ngainatute an pungkhawm hnem dawn.

Kar hmasa khan semifinal Game 1 khelh a ni tawh a, champion lai TBL 67-65 in an chak. BCA coach Lalruatfela chuan tihsual nei loa hnehna an chan tawh tur thu a sawi a; TBL manager Lalawmpuia Pachuau-in Game 3 khelh ngai loa an chak tlang tur thu Vanglaini a hrilh thung - a boruak a dai dawn lo. Court chhunga player inkhel bakah player parukna fans pawimawh ber zan a ni thei hial ang.

Thih leh thih
Zarkawt BCA hian league round lama an hneh tawh TBL lakah chesual mah se chak loh nawn an tum lo. Serpents nen Zarkawt derby an khelh ṭuma inhliam Zonunsanga a dam tawh a, tun season-a guard hmuhnawm ber pawl Zonuna dam hi BCA tan chanchin ṭha a nih bakah an beiseina siamsaktu a ni.

Coach Afela chuan, "Zonuna hliam a dam tawh, duhthusamin la fit lo mah se a inlan ang. Mizo hlangin kan khel leh dawn a, kan tlualchhung player-te hi hnehna min chanpui turin an ṭha tawk," tiin a sawi.

MSL season hmasa pahniha player pawimawh ni phak Matthew Remtluanga Sailo chu kuminah pawh player langsar a ni leh. Zarkawt tlangval hi three points lut thei bik a ni a, ani thlawp tur hian player huaisen Henry Lalrammngaihawma an nei bawk.

Electric Veng guard Henry leh forward Pupua te hian an match hmasa zawkah point 18 leh 15 score thei mah se a tawpah an hriam tawk lo. Zarkawt beiseina chhawm nung tur chuan anni pahnih hi hun pawimawhah an chetfuh a ngai dawn.

Afela chuan beisei an la neih thu sawi zawmin, "TBL ai hian point kan lut thei zawk a, kan ṭha zawk bawk. Kan mamawh chu thawhhona ṭha a ni. Zaninah hian veng mipui bakah hmun hran hrana min ṭantute an rawn kalkhawm hnem dawn a, an puihna zarah hnehna kan chan ngei ka beisei," a ti.

Game 2 a tawk

Mizoram basketball inelna sang bera vawi hnih champion tawh Khatla TBL hian tun season-ah beisei an phak lo, mah se TBL hian semifina-ah team huaisen an nihna leh champion zia an la hloh loh zia an lantir leh thei tawh - rinkai lo kha rinkaiah an insiam mek.

TBL manager Lalawmpuia chuan, "Game 3 khelh hah ngai lo turin hnehna chan leh kan tum. BCA hi team ṭha tak ni mah se Game 2-ah hian an zinkawng tihtawp kan tum a ni," tiin final lut turin match khat bak an mamawh tawh loh thu a sawi.

Champion lai TBL player zingah Lalrinzuala chu damlohna vangin a dinhmun a chiang lo a, midang erawh BCA hmachhawn turin an inpeih. TBL player zingah langsar fal tia sawi tur la awm rih lo mah se Gospel Lalthawmmawia hi basket nei thei bik a ni a, hun pawimawha inlar ṭhin H. Laldinsanga a awm bawk.

Khatla South tlangval Gos-a hian Game 1-ah khan point 13 neiin quarter hmasa ber tih lohah chuan basket a nei vek. Season hmasa ber Most Valuable Player Mapuia'n point riat neiin second half-a a score vek a ni bawk - BCA tan quarter hnuhnung lamah anni pahnih hi ven ngun tur bik an ni.

Fans chungchang sawiin P. Om-a chuan, "Ṭantu mipui kan nei tam zawk dawn, veng chhung mipuiin season hmasa lamah min ṭawiawm ṭha ṭhin a, tun ṭumah pawh hian anni hi kan chakna hnar an ni leh ang," tiin BCA aia fans an ngah zawk a beisei thu a sawi.