Comeback ropui thlentirtu Mizo club Zaninah Aizawl FC Vs Churchill Brothers
Pathianni khan Federation Cup 2017 khelh ṭan a ni a, I League champion Aizawl FC-in Chennai City laka goal hnih an chhuah hnuah goal thumin an chhang let - Mizo tlangval R. Laldanmawia chu chhandamtu a ni. Cuttack-ah Mizo club-in an huaisenna rah sengin point thum an hmu a, Kolkata club lian East Bengal erawh Churchill Brothers-in an chelh thung.
Zanin dar 7:00 hian Group A hmahruaitu Aizawl FC-in Goan club Churchill Brothers an hmachhawn ang a, tlai dar 4:00-ah East Bengal leh Chennai City te an inkhel bawk ang. Fed Cup hi Ten 2-ah pekchhuah a ni.
Champion muthlu
Aizawl FC-in I League-ah Chennai City goal hnihin khualmualah an hneh lo a, Federation Cup-ah vawi khat inlanna Chennai club lakah an talbuai hle. Chennai City manager V Soundararajan-a'n Fed Cup squad-ah Charles 'Tank' Vinicius ziak lut lo mah se Charles de Souza an la kawl a, Tamil Nadu club hian first half an thunun.
Chennai City-in Charles hmangin minute 13-naah goal hmahruai an khung a, minute 39-naah Edwin Vanspaul-a'n Aizawl FC lamah a khung leh bawk. Goal hnih luh danah hian AFC tlarhnung an muthlu a, Chennai City-in an
ṭhiat chiang hle.
Mizo club hi mumang ramah an la cheng a, I League champion an nih avangin goal an nei sa lo a, mualpho thei dinhmunah an ding. Season liam ta khan Fed Cup first round-ah I League champion Bengaluru FC chu pariatna Aizawl FC-in an pet chhuak tawh bawk.
Hei le, Mizo tlangval
Second half-ah Aizawl FC an khel ṭha nghal lo a, amaherawhchu minute 53-naah Kamo Stephane Bayi-a pass chu Syrian midfielder Mahmoud Al Amna-a'n khungin inkhel kalhmang a dang nghal.
Mizo club-in inkhel an thunun a, minute 62-naah Jayesh Rane cross chu Danmawia'n a tauh goal. Sialhawk tlangval hian Syrian midfielder Amna vawrhluh ṭha tak chu keeper Karanjit Singh chiah a hmachhawn hnuah a pet over.
First half-a goal hnih chhuah AFC tan point khat hmuh pawh result ṭha ni mah se I League champion Khalid Jamil-a hoten an la duhtawk lo. Mizo team-in game mawi an khelh chhunzawm a, minute 81-naah Ivorian forward Kamo-a ball pass chu Danmawia'n chakna goal ni turin a khung. Sialhawk tlangval hian goal pawimawh khung turin a tlan chakna a hmang ṭangkai a, goal hmaah player danglam bik a nih zia a pholang bawk.
Semifinal-ah team hnih
East Bengal-in Wedson Anselme hmanga an goal khung an hum zo lo a, Churchill-in minute kua chiah a awm tawh tihah Ansumana Kromah hmanga an sut avangin 1-1 in an inhnehtawk. Goan club chak theihna hun ṭha erawh Khasi tlangval Chesterpoul Lyngdoh-a'n a hmang ṭangkai thei lo.
Fed Cup-ah hian I League-a che ṭha pariat te chu group hnihah ṭhen hran an ni a, group khat aṭang hian a sang pahnihin semifinal an lut ang.
Inelna Thlirna Tawi
Zanin In khel Tur
4:00 PM East Bengal Vs Chennai City
7:00 PM Aizawl FC Vs Churchill Brothers
May 7, Pathianni
Chennai City 3 - 2 Aizawl FC
CCFC : Charles De Souza 13'; Edwin Vanspaul 39'
AFC : Mahmoud Al Amna 53'; Laldanmawia 62', 81'
East Bengal 1 - 1 Churchill Brothers
EB : Wedson Anselme 66'
CB : Ansumana Kromah 81'