United hnehtu Arsenal beiseina a nung

Arsenal chuan Manchester United 2-0 a hnehin a sang pali zinga tel an beiseina an chhawm nung. Premier League match 25 chhung hneh loh tawng lo United an tlawm avang leh, inkhel dangah Liverpool leh Southampton te goal awm loa an inhnehtawk avangin Cham­pions League khelhna hmun inchuh boruak a sang thar hle.

Pathianni zan Emirates Sta­dium-a inkhelah Gunners midfielder Granit Xhaka-a'n yard 25 a hla aṭangin minute 54-naah goal hmahruai a khung a, goal hmasa zawk luh aṭanga minute thum hnu lekah Danny Welbeck chuan a club hlui lakah a tauh lut bawk.

Arsenal hian point 63 hmuin league table-ah parukna an nih chhunzawm a, palina Man­ches­ter City an phak lohna chu point ruk a ni. Gunners hian match khatin an khel tlem zawk. Ni­ngani zan hian Southampton an lenchilh dawn a, point thum an hmu thei a nih chuan khelh zat inangah an chung chiaha awm United an lehpel ang.

A pawimawh

Arsenal hian United lakah hnehna an chang chungin Cham­­pions League an khelh phah dawn tih a la chiang lo. Mahse, Arsene Wenger-a'n Jose Mourinho laka a record duhawm lo tak a thaibona ni a nih avangin hnehna hlu bik a ni.

Manager pahnihte hi tun hmain competitive match bikah vawi 15 an inhmachhawn tawh a, Mourinho hian vawi riat hnehna changin ṭum sarih chu an inhnehtawk - Wenger-a'n hnehna a chan vena awmchhun chu 2015 Community Shield chiah kha a ni. Tunah chuan Wenger hian competitive match-ah Mourinho a hneh ve ta!

Arsenal manager Wenger chuan, "Pressure kan neih avang­in a tirah kan khel ṭha tawk lo, a rei hnuah erawh team ṭha zawk kan ni. Kan tan chuan hnehna pawimawh a ni, eng inkhel pawh hi a pawimawh vek. Kan dinhmun hi a khirhkhan tawh hle a, heti chung hian a tawp thlengin theih tawp kan chhuah tur a ni," tiin a sawi.

Europa League zawk

United hian khualmualah Celta Vigo 1-0 in an va luh­chhuah tawh a, Europa League second leg khel turin Ningani zanah La Liga club hi an lo mikhual ve leh thung ang.

Portuguese manager Mou­rinho-a'n a sawilawk tawh ang ngeiin league ai chuan Europa a ngaipawimawh zawk. Celta Vigo hnehtu team aṭangin pla­yer pariat ngawt a siksawi. Juan Mata chuan a ṭhâl na a dam hnuah inkhel bul a ṭan leh thei tawh, defender Axel Tuanzebe-a'n a vawi khat nan Premier League a khel ve bawk.

Kum 54-a upa Mourinho chuan, "Kan inthlak nasa, hei hian kan ṭhat dan berin ka khel lo tih a ti lang chiang. League table-a palina nih ai chuan Europa League nomawi chawi kan duh zawk," a ti.

Chelsea manager hlui chuan sawi chhunzawmin, "Nomawi ka chawi hnuhnung ber chu thla thum liam ta mai kha a ni, tuna kan chak loh hi chu ka lungkham hran lo. Ningani zan Old Trafford-a kan inkhel tur hi tun season-a kan match pawimawh ber a ni hial ang," tiin league aṭang ai chuan Europa champion ni chunga Champions League khelh a tum thu a sawi nawn.

Reds an chelh

Anfield-a inkhelah James Milner chuan kum 2009 Novem­ber thla hnua a vawi khat nan league match bikah penalty a hlah! Southampton keeper Fraser Forster chuan minute 66-naah Mil­ner penalty chhuih hi dan sakin khualmualah a team chu point khat a hlawhchhuah pui a ni.

Reds hian point 70 an hmu a, league table-ah pathumna an ni. Jurgen Klopp-a naute hian West Ham leh Middlesbrough an hmachhawn leh dawn a, hnehna an chang a nih chuan midang inkhel result ngaihtuah buai loin a sang pali zingah an tel chiang ang - an kutah a awm tihna a ni.

Liverpool boss Klopp chuan, "Ka naute khelh dan kha hnehna chang turin a ṭha tawk. Mahse, kan khingpui player 10 zet khan an goal venhim an tum tlat avangin a harsa a ni. Tunah hian kan hmabak kan la hlen lo a, West Ham khelmualah hnehna chan tumin kan kal ang," tiin inkhelh hmabakah chak a duh thu a sawi.