AFC Congress hman a ni

Asia khaw­mualpuia football thu­neitu sang ber Asian Football Confederation Congress chu nimin khan Bahrain khawpui Manama-ah hman a ni a, he hunah hian India aiawhin MFA honorary secretary Lalnghinglova Hmar, AIFF president Praful Patel leh general secretary Kushal Das-te chu an tel.

AFC Congress hian FIFA Council-a member pathum an neih ṭhin pasariha tihsan a nih tak avangin member pali dang an thlan belh a, an thlanchhuahte hi Mahfuza Kiron (Bangladesh), Zhang Jian (China PR), Chung Mong Gyu (Korea Republic) leh Mariano V. Araneta Jr. (Philippines)-te niin Bangladesh nu Kiron hi hmeichhe tana hmunruak pakhat bikah thlan tlin a ni.

He hunah hian AFC president Shaikh Salman bin Ebrahim Al Khalifa chuan thu sawiin, " Reilo teah Korea-ah U20 World Cup neih a ni dawn a, India-in FIFA U17 World Cup a thleng dawn bawk. Tun hi Asia tan chuan hun rangkachak a ni," a ti a, football khawvel awp tura hma an lak mek thu a sawi.