K. Kawla Football Mipa final-ah Lunglei Vs Champhai

Assam Riffles leh MFA ṭangkawpin an buatsaih CAPF K. Kawla Under 19 Talent Hunt Football Tournament 2017 chu vawiin hian Lammualah a hmawr bawk a ni dawn. Chaw­hma dar 9:00 hian Kolasib leh Aizawl ten hmeichhe final an khel ang a, tlai dar 5:00 hian mipa final-ah Lunglei leh Champhai te an inhmachhawn bawk ang.

Mipa inelnaah nimin khan Cham­phaiin final lut turin Mamit 3-2 in an hneh a, Aizawl champion beiseina a tawp. Champhai hian an match hmasa berah Lawngtlai draw mah se an vawi hnih khelhnaah an elpui Aizawl chu 2-1 in an lehthal a, an match hnuhnung berah Mamit an hneh leh bawk avangin an phu ang ngeiin final an khel dawn a ni.

Champion rinkai erawh Lunglei an ni a, match thum khelhah Lunglei hian Kolasib (5-1), Siaha (5-0) leh Serchhip (2-0) an hneh vek a, goal 12 khungin goal khat chiah an chhuah. Leitlangpui lam hian goal khung thei player an ngah a, goal khung tam ber Silvana R. Lalruatkima pawhin goal thum chiah an la khung.

Hmeichhe lam­ah Aizawl chu cham­pion ngei tura ngaih an ni a, anni hian final lut turin goal chhuah loin goal 25 an khung. An khingpui tur Kolasib hian match thumah point kua hmu ve tho mah se an chakna hi goal khat zel a ni.

Vawiinah Final
Hmeichhia
9:00 AM Kolasib Vs Aizawl
Mipa
5:00 PM Lunglei Vs Champhai
Nimin Inkhel Results
Mipa
Mamit 2 - 3 Champhai
MAM : Samson VL Hriatpuia 5', 39'
CHA : Zomuansanga 15', 23'; Lalthawmmawia 17'
Hmeichhia
Serchhip 0 - 3 Lunglei
Walkover-in Serchhip an chak